【本報訊】黃霑出道至今，提攜後輩受人敬仰，當中於中學時已經開始接觸音樂的雷頌德，於大學畢業後便跟隨黃霑加入音樂圈，與黃霑一起搞電影配樂得到黃霑多年的支持與教導，雷頌德現已成為香港的名創作人之一，他表示很懷念這位恩師。
雷頌德昨日說：「我覺得佢係一個唔可以取替嘅作曲、作詞人，我諗佢寫歌詞就係香港嘅歌，唔係淨係話流行曲，佢嘅歌就係香港人嘅歌，呢樣嘢唔係個個人都有能力去寫到出嚟，除咗自己技巧方面，而係佢嘅氣量，呢樣嘢好睇個人本身個性格同修養有幾多。」
而前組合Swing成員兼創作人郭偉亮（EricKwok），昨日亦細說對黃霑這位前輩的一番感受，他說：「我諗霑叔係一個我覺得唯一一個可以令到香港人真係去聽、去講嘅人，佢係可以領導到香港人嘅思維，佢好前衞，冇乜幾個人可以咁做，對我自己嚟講佢好似個父親嘅角色，因為佢好多言行舉止都好似我daddy，我次次見到佢嘅訪問都好想聽，佢教咗我好多嘢。」
郭偉亮續說：「喺呢個時候香港經過咁多嘢，實好需要有一個佢咁嘅人去帶領我哋，但係好突然，竟然喺呢個時候走咗，我諗係香港人喺呢個時候要考驗自己，唔可以再聽到佢帶畀我哋嘅說話，我哋要好好睇番以前嘅嘢好好學習，係時候去懷念佢。」