繼鰂魚涌電訊盈科中心易手後，九龍酒店成為投資市場另一熱點，市傳潛在買家之一、資深投資者羅家寶，一直對有否入標保持緘默。不過，佢標售灣仔服務式住宅君悅居，叫價就由四億五加到五億，至今重未賣出。唔知係咪因為買唔成九龍酒店，旗下物業一於惜售。
據悉，君悅居截標當日，有五個買家入標，最高標價超過四億，已經唔錯，但見個市節節上升，羅家寶拒絕接受買家出嘅價。
市場人士較早時估計，羅家寶如果買得成九龍酒店，就會落實以近四億出售君悅居，如今似乎落了空。
至於九龍酒店，新地、信店及順豪證實入咗標，而持有九龍酒店毗鄰彩星中心嘅渝太地產，聞說亦加入。渝太母公司渝港國際嘅主席張松橋，喺地產市場唔算太活躍，但月前曾趁豪宅熱潮，拆售私人持有嘅淺水灣寶晶苑十四座洋房。
嘉里建設較早時為豪宅設立新品牌KerryResidence，係全方位跨地域嘅管理概念，除香港外，重包括北京、上海與深圳等物業，住客可以獲得相同服務及優惠。
KerryResidence今個月為住客搞美酒體驗，同「脊椎健康講座及自我評估工作坊」。美酒體驗畀住客品嘗法國名酒，重可以同葡萄酒專家分享經驗心得。工作坊由註冊物理治療師教導住客，點樣自我評估及保護脊椎健康。
佢哋預告，下個月會畀住客優先睇聖誕電影《北極快車》首映。
代理行除咗開班教員工搵食技巧，𠵱家連另類課程都開埋，美記就開辦「一指禪」氣功課程，幫夥計強身健體。聽講，重可以增強智力，以及有美容功效。
今次請嚟導師教三套氣功，「開七竅」、「九節丹田功」與「龍太虛」。美記工商舖行政總裁黃子華都有報讀，重好投入咁學「九節丹田功」，係咪有用，遲啲問吓佢就知嘞。
另外，佢哋今日會喺澳門連開三間分行，其中旗艦店有五千呎，真係當之無愧。
市道旺，地產代理每年舉行嘅周年晚會愈搞愈盛大。利記今年首度喺灣仔會展舉行，筵開二十席。
利記何紹章話，由於集團人手已由舊年七百，增加到𠵱家千一人，預計年底前會增到千三，所以選址一定要夠寬敞，預計使費二百萬。
為加強員工投入感，籌委會舉辦餐舞會口號創作比賽，勝出者可獲一千蚊。
既然樓市咁好景，佢哋以後每個禮拜二，都會用龍虎榜方式，定期公布十個二手屋苑成交，畀大家了解市況。
港人每年購買內地住宅超過兩萬伙，總值逾百億，主要由發展商自己銷售，或委託代理發售，不過，買家𠵱家可以一次過睇到過百個盤，咁就容易啲揀到心水單位。
今個禮拜五至日，灣仔會展舉辦「2004中國商業地產香港推廣周」，有嚟自上海、北京、重慶、成都、天津、瀋陽、廣州及深圳等，逾二十五個發展商參展，較為港人熟悉有深圳市益田房地產集團、廣州市城市建設開發公司。展品包括住宅、別墅、寫字樓與商舖。
喺上海有唔少房地產投資，兼有「上海姑爺」之稱嘅瑞安集團主席羅康瑞，會做剪綵嘉賓。
電郵地址：
