港股終於再衝破14000點大關，創出今年收市新高，噚日成交重大增到262億元，動力強勁，新升浪確認，中線目標指向14500至15000點。
噚日係港股新周期的第一日升市，未來的三數日，仍可看好，重會出現百花齊放局面。噚日期指開始轉倉，數量唔大，但轉到咁高價，睇嚟今個月高位結算機會甚大。
早輪推介過嘅中小型地產股，呢排紛紛飆升，增值幅度都幾可觀。10月28日，推介泛海（129），當時股價0.315元，相隔3個禮拜，已升到0.445元，升幅超過4成，家吓仍可以止賺位策略繼續持有。11月6日，推介泛海控股公司滙漢（214），當時股價3.0元，噚日最高3.95元，收3.775元，半個月升幅25%。泛海近日有美資大行推介，但論抵買，滙漢重有吸引力。第一，滙漢04年度（3月年結）的每股資產淨值12.05元，現價股價大幅折讓68%；第二，05年度，估計滙漢盈利有1.5億元，每股盈利0.98元，PE不足4倍。PE低，折讓大，折讓就算收窄到50%，股價已可見6字頭。
重有1隻，就係莊士機構（367），11月15日推介，當時股價0.66元，噚日收0.79元，短短1個禮拜，升幅近20%。莊士家吓嘅每股資產淨值係1.87元，就算升上0.90元，折讓仍超過50%。
銀建國際（171）走勢噚日又出現突破，高收4.475元，升6.5%，創出新高，成交亦比上日倍增至5500多萬股。噚日升勢咁勁，主要係有大行大手吸納，以現水平重積極上車計，相信股價短期內先衝5字大關，再向6字頭推進的機會甚大。
銀建自獲花旗入股後，已引起基金注意，聽聞銀建同花旗短期內會攜手上演多場好戲，唔排除雙方會加強合作，公布發展大計，以及進行全球巡迴推介等。有花旗擔大旗，相信「路騷」會好哄動。
銀建早前收購咗569億元的不良資產，有花旗幫手包裝同出售，處理速度肯定會比預期為快，利潤亦會比預期為多。
銀建現時同大股東信達傾緊嘅「刁」，涉及資產會以千億元計，而花旗肯定會擔當更重要角色。噚日有大行出報告，推介買入，目標價5.40元，重聽聞另一家大行嘅目標，更係6元過外。
郭兆誠