啱啱攞咗瑞典足球先生嘅巴塞隆拿前鋒拿臣，喺上周六對皇馬場西甲大戰整親膝頭韌帶，要提早收咧；而佢諗住橫掂明夏約滿都唔慌有得續約，於是計劃退休，但巴塞有情有義，即刻同佢續約一年到○六年夏天。
拿臣今夏由些路迪過檔巴塞隆拿，簽約一年生死一年死約；雖然佢成三十三歲人，但對自己好有信心，冇租屋直頭置業，想喺西班牙長住。事實證明佢重好勁，喺西甲同歐冠盃共入咗四球，表現拍得住朗拿甸奴同伊圖。
但好唔好彩，佢喺贏皇馬三比○場聯賽重創，要休息六個月先可返球場比賽。由於佢年紀唔細，所以佢唔認為有得繼續留喺巴塞；但所謂「天無絕人之路」，巴塞都算有情義，覺得佢因隊波而受傷，不但冇放棄佢，而且重同佢續約一年，真有王者風範。
拿臣有機會重生，希望佢第日好番，可以踢好波，以答謝巴塞對佢嘅支持。
中國靚仔球星張玉寧喺四年前因為危險駕駛，除咗搞到佢自己瞓咗好耐醫院，重令佢沙煲兄弟曲樂恒變成殘廢，以後都踢唔到波，結果法院喺噚日判張玉寧要賠二百三十四萬人民幣畀曲樂恒。事後張玉寧話佢願意賠錢，而且重同曲樂恒公開道歉，但後者就話大家以後都再冇朋友做。曲樂恒本來係中國其中一最有前途的球員，𠵱家乜嘢前途都冇晒，又難怪佢咁嬲張玉寧。
曼聯領隊費格遜因為唔滿意英國廣播電台（BBC)，話佢同做球員經紀嘅仔積臣私相授受，話明以後唔會接受該間公司任何形式嘅訪問。我求大俠覺得費格遜身為一間大球會嘅話事人，而且又係爵爺，好心就大方啲，唔好咁記仇；況且，如果佢冇喺球員買賣上食球會夾棍，根本就係冇有怕。不過𠵱家佢向英國廣播電台落禁令，擺明係除咗想公報私仇外，重因為佢自己心虛。
熱刺前晚作客輸畀維拉○比一後，喺英超經已六連敗；季初佢哋打得唔錯，一度兩勝四和，就連車路士亦畀佢哋迫和，𠵱家搞成咁真係可惜。話時話，球隊喺換咗領隊之後，表現通常會好番啲，好似西布朗，佢哋改由白賴仁笠臣教後，第一場對米杜士堡即使唔反底，到第二場對阿仙奴終於嚟料；熱刺喺祖爾領導下聯賽已三連敗，嚟緊會對米堡，不妨留意吓。