陰盛陽衰現象，喺媒介日益嚴重。有線電視新聞部唯一全職男主播李潤庭，前日都走埋，成個台全女班。有線新聞部一哥趙應春提起此事有些少欷歔，佢又叫各方狗仔隊放佢啲夥計一馬，咪嚇親佢哋。無綫新聞部新老細袁志偉就話翡翠台重有男主播，但銀河嗰邊亦冇晒。
不過各位喜歡李潤庭讀新聞者，唔使擔心，因為佢只係跳槽去亞視，並非轉行，遲吓都有得睇。講起亞視，佢哋同電盈NOW合作搞二十四小時新聞台，招兵買馬，本來傳話前幾日啟播，但結果未成事，相信係要精益求精。NOW推出短短一年，已有逾三十六萬客，早前唔聲唔聲去搶足球轉播權，搞到有線陣腳一亂；今回做新聞台，阿春哥同佢嘅全場女將都要奮起迎戰了。
（圖）喺有線芸芸靚女主播中，王靜茵都算受歡迎，噚日喺下午當主播，聽講啲fans好高興。有線電視圖片
傳真︰2623-9278
電郵︰