澳門賭業概念股終於見到有所收斂，除咗新加入話想收購澳門酒店的瑞力控股（491）勁升五成，同埋帶傳媒作澳門遊的奧瑪仕（959）再升11.25％外，其餘好多都見回吐，例如友力投資（674）跌24.29％，收0.53元，而漢基（412）亦跌19.27％，收6.7仙。
經紀陳話，一來係炒家搵到食，沽貨獲利，重有就係龍頭股新濠國際（200）遲遲未復牌，同埋炒得㷫烚烚的英皇國際（163）同埋英皇中國（296）停牌，市場唔知佢哋搞邊科，所以沽貨獲利好正常。
經紀陳又話，不妨留意就快改名泰德陽光的陽光體育媒體（307）。聽講陽光新大股東泰德集團，喺上面有唔少搞作，除咗搞遠程教育之外，喺深圳都有搞書報發行分銷。
由於泰德在大陸名聲唔錯，家陣買隻殼番嚟，若有注資行動，隨時又可炒番轉，近排呢類仙股特別受炒家歡迎，可以儲定多少貨等人炒起。
陽光昨日最高見過2.4仙，收2.2仙，冇起跌，成交股數1.65億股，金額380萬元。
慕容小初