汪明荃、胡杏兒、伍詠薇、康華、黃
阿姐之前曾憑劇集《婚前昏後》奪得無綫「我最喜愛的女主角」獎,對今次黎姿奪獎惹嚟觀眾不滿投訴,佢話:「只係你哋撩出嚟,我唔知,唔好問我呢啲嘢,我又唔係評判。」
伍詠薇在劇中介入阿姐與石修的婚姻,她說:「阿姐同石修係我偶像,今次重同阿姐爭仔,我有好大滿足感。」
而扮演野蠻新抱嘅胡杏兒,就話同阿姐合作有壓力,佢話:「阿姐好準時,我今朝都好早返到嚟。之前同阿姐都有合作過,但好少對手戲,佢上次都教識我好多嘢。」
至於康華同黃瑩,二人喺劇入面嘅角色,則被阿姐笑指係《金枝慾孽》入面,分別由鄧萃雯同陳秀珠演嘅如妃同皇后。
蕭亞軒噚日喺台灣出席潘婷美髮產品宣傳,佢做咗台灣嘅代言人都有五年咁耐。而且最近啱啱喺美國紐約學完舞返嚟,佢以國語話:「這次美國之旅,我學會了照顧自己,亦學會了不亂花金錢,以往在台灣刷卡後不看帳單便簽名。」
陳啟泰噚日以護肝大使身份去咗瑪麗醫院出席活動,佢話好彩自己同屋企人都冇肝病,不過佢就話唔會做正式嘅身體檢查,反而鍾意做一隻白老鼠四圍試啲新保健方法,好似以前飲尿都係因為咁嘅原因,不過佢𠵱家已經冇飲,亦奉勸其他人唔好模仿。
方力申同何韻詩噚日喺黃埔出席港台「無火主席--展能廚房」廣播劇宣傳,大會安排咗一班傑出殘疾僱員到場,方力申話本身都認識一些殘疾運動員,對佢哋堅毅嘅人生觀好欣賞。方力申話:「我都有一位失明女歌迷,佢話聽咗我啲歌之後就鍾意我,我都好希望可以帶到啲正面訊息畀佢哋。」
彭順同彭發兩兄弟拍嘅《阿孖有難》上咗幾日,票房都係一般,不過早幾日影評人石琪喺報紙度就寫咗個影評,話彭發嘅才能只適合拍驚慄片,兩兄弟睇到篇嘢之後唔多高興,噚日喺報紙登咗個聲明,話對呢篇影評存在質疑態度同憤怒。噚日馮仁昭打畀彭發,佢話:「𠵱家電影市道咁差,石琪係一個資深影評人,實在唔明點解佢會寫啲咁嘅嘢,我哋的確幾嬲。」