與鍾楚紅及已故的張國榮等紅星友情深厚的著名專欄作家兼資深傳媒人林冰，昨日凌晨被發現在家中猝逝，終年六十三歲。白韻琴透露在林冰出事前曾到對方家中吃飯，昨日她接獲林冰死訊後哭成淚人。周潤發則憶述林冰生前不時提攜後輩，對林冰猝逝感惋惜。
著名專欄作家林冰昨日凌晨時分被發現在家中猝逝，終年六十三歲，而揭發今次意外的是林冰友人何小姐，何小姐昨在電話中說：「我哋成班朋友本來約咗噚晚食飯，但噚日下晝一直搵唔到佢，我哋覺得有啲唔妥，所以噚日食完飯之後，我同另一個有佢屋企鎖匙嘅朋友，上佢銅鑼灣屋企搵佢。
「去到時見到星期日同星期一嘅報紙放咗喺門口，大門就反鎖咗，好擔心，所以就報警，由消防員撬門入屋，發現林冰着住衫瞓咗喺浴室度，成身僵硬，警察話佢已經冇得救，估計係佢個頭撼咗落地下。」
白韻琴在林冰猝逝前，上周六曾跟幾名友人到她家中晚飯，白姐姐昨日在電話中邊哭邊說：「我今日凌晨接到朋友嘅電話，佢通知我冰姐嘅死訊，我覺得好突然，真係接受唔到，我好唔捨得佢，估唔到嗰晚係我哋同佢嘅最後晚餐，我都有啲自責，嗰晚如果留夜啲，可能佢唔會咁樣走咗。」
林冰生前曾指周潤發是其偶像，發哥昨日得悉林冰猝逝時十分意外，發哥在電話中說：「好可惜！同林冰好耐冇見，冰姐以前喺邵氏做宣傳時好提攜後輩，寫嘅嘢好中肯，啱啱出道嘅藝人佢都會畀意見，用前輩嘅經歷去勉勵後輩。」
而張堅庭當年曾稱呼林冰做「契姨」，但十多年前二人因小誤會而沒再聯絡，張堅庭昨日在電話中說：「話晒件事都隔咗咁耐，我都冇嘢啦，早幾個星期重想透過朋友約冰姐出來飲餐茶，估唔到佢咁就離開咗，我哋都冇機會冰釋前嫌，好遺憾。」
採訪：蔡丹
