每年臨近奧斯卡，各大電影公司都會力谷佢哋嘅電影，務求攞到最多提名，但其實唔少獨立製作、動畫電影甚至外語片都有機會入圍競逐最佳電影。
巨製《亞歷山大帝》早排俾各方睇好係下年奧斯卡嘅爭勝熱門，但近日嘅負面新聞就搞到部片要提名主要獎項都唔係咁穩陣，反而由《薯嘜先生》導演亞歷山大佩恩（AlexanderPayne）執導嘅獨立製作《Sideways》就獲得唔少奧斯卡評審垂青，另外米高摩亞（MichaelMoore）嘅紀錄片《華氏9/11》、動畫《超人特工隊》同兩部外語片《美麗緣未了》及《哲古華拉少年日記》，都有望問鼎最佳電影。
而影帝之爭都相當激烈，尊尼狄普（JohnnyDepp）、占美霍士（JamieFoxx）以至奇雲培根（KevinBacon）個個都話有機，就連《同行殺機》嘅湯告魯斯（TomCruise）都話有可能入圍，不過由於部戲喺夏天上，所以夢工場會喺最後關頭諗計力谷。
雖然𠵱家嘅形勢似乎好亂，不過下個月一號全國電影評論協會公布獎項後，其他被視為奧斯卡指標嘅頒獎禮都會陸續揭曉結果，金球獎亦會喺下個月十三號公布提名，到時形勢就會明朗化。
而《亞》片就唔理咁多，台前幕後前晚齊齊出席喺紐約嘅首映造勢，哥連菲路（ColinFarrell）重透露佢十八歲嗰陣因為酗酒吸毒而搞到抑鬱，睇咗半年精神醫生。