昨日講到時裝專家靚女C舖頭與土瓜灣醫務所突然停電，懷疑受騙之事。騙徒可能有兩人，一在外面做手腳，搞到舖頭停電，然後假好人巧合地在舖頭外出現，做工夫呃零件費。
靚女C到相熟茶樓飲茶，掃地阿嬸同佢傾幾句，講起舊零件之事，阿嬸話：「唉，佢哋有路㗎。我哋班公屋鄰居，以前不時到建築地盤、廢物堆執舊零件、舊建築用物，執執埋埋，賣番幾個錢。現在冇咯，乜鬼垃圾都俾自由行遊客執晒去，佢哋鬼咁勤力，人又多，手快腳快，乜鬼嘢都俾佢哋執清光！」
自由行遊客一方面帶旺零售，另方面帶來不少靚女在酒店搵生意，估唔到連拾荒客都嚟埋，搶基層人士嘅下欄收入。而電工騙徒做一番工夫，每次呃三四百，證明市場上難搵工、易出術，所謂經濟好轉，只係炒樓炒股客（本身已有資本）最得益，其他人得個望字。
有資本就易搵咯。聽完靚女C講故事，跳上的士，司機竟然要求講解為何的士牌價猛咁升，升到近四百萬。問佢：「生意如何？」司機答：「好少少啦，咪一樣排隊等客，一樣要用八折價搶客！」租金呢？答曰每更三百，車主可每日收租六百，每月付千零蚊維修，總收入約萬七銀，一年收二十萬左右。咦，牌價四百萬，回報率近乎五厘，扣除其他使用，相信亦在四厘以上，好過銀行存款利息零點零一厘多多聲。唔怪得，目前炒風初動，炒樓炒股炒的士小巴，皆因過低利率作怪，趕啲存款出銀行，買番架的士收租。
有資本有得講，冇資本又點？只能講一句，無限同情。