民主黨主席楊森終於宣布：不再競選連任黨主席，新任黨主席下月中由民主黨選出。不過八方在此質問民主黨：既然呢個黨支持○七、○八普選，遭到中方否決。咁點解民主黨主席唔可以由普選產生？
民主黨主席由普選產生，好處多籮籮。第一，民主黨可以鹹魚翻生，由市民一人一票決定黨主席，咁喺泛民主派之中，民主黨認受性劇增，一夜之間又可以變為旗艦，以後喺立法會講嘢，把聲都可以變到最大。
第二，民主黨內既然有咁多山頭，一啲又話要堅持結束中方一黨專政，一啲又話要平反六四，一啲面對中方，有少少腳軟，猛話要溝通。少壯派唔妥老嘢，話自己冇得上位。好嘞，與其由民主黨一千幾百人小圈子選主席，民主黨何去何從，點解唔由選民決定，第日打死無怨？
第三，○七、○八雙普選冇得傾，又話係「違反基本法」，咁全民普選民主黨主席冇違反基本法啦啩？立法會選舉，投民主派嘅有一百幾十萬人，加埋7.1大遊行班底，登記嘅選民，如果對今年立法會選舉條氣唔順，唔怕，下月中選番民主黨主席，咪當做二○一二直選熱身囉！
第四，就係民主黨主席直選，亦都幫到胡溫，穩定香港民情！嗱，○七、○八直選都俾你扑低咗嘞，但市民條氣點樣出？若然有渠道出吓火，條氣落咗，出年7.1就冇咁多人上街嘞！
何況共報得意洋洋咁話：民主黨要先做到「黨內民主」，先至好講全港普選民主吖！黨內民主吖嘛？得吖，咪民主黨以身作則，畀全港普選黨主席先囉！
黨主席開放直選，即是一間公司上市，從此透明度更高，更向公眾問責，公信力亦所向無敵。為表器度，泛民主派議員，人人可以參加，余若薇、大班、長毛，全部可以報名！
不過咁，要經由黨內幾千個會員初選先，篩選剩三個，至交由全港市民直接投票！
張文光控制教協，開放幾間學校做票站全無問題！直選由民主黨做起，人蠢冇藥醫，有膽就做喇！
傳真︰2623-9278
電郵︰