𠵱家喺大學教書真係唔容易，啲學生唔止要求教授講嘢生動幽默似棟篤笑，揀科又要揀啲易「過」嘅（pass咁解）。噚日攞咗港大教學院士榮銜嘅電機電子工程系副教授鄒國棠博士，就對學生特別有辦法。教電動汽車嘅佢，會用「遊車河」教學法提升學生嘅學習動機，唔單止喺色彩豐富嘅notes加啲靚車相，佢重會揸埋架電動車返學校，載埋同學仔兜風，佢重話電動車可以開到百幾公里，快過普通車咁話。
而噚日一齊攞獎嘅重有奪得研究成就特獎嘅微生物學系斐偉士教授、管軼博士同埋袁國勇教授；著名內科教授黎青龍就取得傑出研究學者獎，佢姐姐前教署署長余黎青萍特登到場恭賀佢，認真姐弟情深。至於校長徐立之唔知係咪開心得滯，八方問佢早前喺美加攞嗰幾個研究獎，佢居然唔記得咗，要公關姐姐提醒，真係無記性。
傳真︰2623-9278
電郵︰