隔晚油價回落，美股好番啲，港股又嚟過，恒指彈升222點，升破萬四關後守到實一實。早段「高」位追C輪，到埋單已經有魚有肉。
新地C輪：李超人掂檔，長實（001）彈升2.75元或3.9%，前日成交金額唔夠6億，昨日上到接近20億，長實C輪2249再升23%，前日夠膽低位撈貨，原來可賺56%。臨淵羨魚，不如退而結網。
新地（016）升得1元，是日落後長實好多。市場錢多，唔會淨係長實獨領風騷，新地點都會跟埋上去。
揀新地C輪炒，熱門貨例牌係2252同2276。2252明年2月夠鐘，輪價60仙，溢價1.6%，槓桿率13.1倍（有效8.9倍），引伸波幅26.1%。2276明年3月到期，輪價55仙，溢價2.2%，槓桿率14.3倍（有效9.1倍），引伸波幅23.9%。結合各項數據，2252靚過2276一個馬頭位。
國壽C輪：國壽（2628）收5.80元，升5仙咁大把，喺5.80元上下打底，足足有9個交易日，整固完畢，隨時上去，唔望太多，上三兩毫，揸C輪就有好理想回報，對象係2143，明年1月到期，輪價67仙，溢價1.2%，槓桿率8.7倍（有效7.2倍），引伸波幅36.6%。
滙控C輪：上周一晚HI派季度成績表後，滙控（005）昨日第一日有得升，收134元，進帳1.50元。今日除息1.01元（係除息，唔係除淨；除息指派齋息，除淨係指有嘢送，例如紅股、紅利、窩輪等）。4441收96仙，負溢價0.4%，假設今日滙控實際冇升冇跌，即係132.99元，則隻輪實際溢價係0.4%，仍然非常正斗，正斗非常。
章盛