港股噚日低開高收，表現比預期為佳，上試14000大關的衝關前調整，有可能已完成。
恒指最低13629，跌157點，但見趁低吸納的買盤頗為活躍，午後行情逐步由低位回升，重上13800水平，收市反升12點。基本上，大市走勢已轉弱，噚日早段大跌，走勢更明顯轉壞，幸好中段之後抽番上去，反跌為升，證明市底確係好強。
其實，家吓各路資金正在香港呢個彈丸之市興風作浪，部署咗幾個月，會唔會升一千點就收手？萬四係一個重要關口，調整一吓，可以話係「徇眾要求」，如無突發事件，恒指唔會大跌，有的亦只係小調整，到整固完成後，好大機會衝關而上，下一個浪的目標，樂觀預測可以超過15000。
藍籌股以長和系表現最突出，長實（001）收70元，升0.75元，和黃（013）收64.25元，升0.5元。和黃近期成為大行全力推介的對象，里昂報告指和黃3G業務表現理想，具市場競爭力，故調高和黃投資評級，由「落後大市」調升到「買入」，目標價84元。高盛亦將和黃評級調高至「優於大市」，1年目標價由75元調升到80元。
和黃自衝破62.50元的高位阻力後，升上64.75元才出現調整，形成後抽，噚日低試62.75元後抽上64.25元收市，創出今浪新高，短線量度上升目標70元，中線76元。若嫌買和黃成本大，可吼C輪2157，0.8元水平的整固已完成，噚日大陽燭破位上，目標直指1.20元。
吉林化工（368）氣勢如虹，整固一日又再飆升，高收2.775元，升7.7%，早日話目標價2.85元，相信好快達到。吉化股價近日雖升咗成20%，但大行噚日重係好主動咁掃貨，佢哋嘅目標價會係幾多？
除藍籌國企外，大行呢輪亦睇中好多二三線實力股，泰山石化（1192）就係其一。聽聞有家美資大行派咗一隊「添」嚟香港，同泰山高層傾偈，若果傾得埋欄，泰山肯定又會成為另一隻明星股。
泰山主要做石油運輸、倉儲同貿易，有消息指在浙江省洋山港興建嘅大型倉儲設施，好快會達成協議，而集團亦會繼續增購油輪，擴大船隊，以應付市場需求。
近個多月泰山走勢形成上升楔形，噚日突破，照度上去，中線目標1.20元。
郭兆誠