即將卸任嘅白鴿黨主席楊森認真畀面李鵬飛，放棄連任呢個大新聞，之前一直保密，等到上周六上飛哥喺有線主持嘅節目「飛常政經」先宣布。飛哥話，楊森事前都冇同佢單聲有猛料爆。
飛哥估計，楊森之所以揀咗自己嘅節目做宣布，係因為節目時間有成個鐘頭，畀佢可以詳細解釋棄選原因，好清楚睇到，楊森一講完成個人即時輕鬆晒。
飛哥話，民主黨其實有好大發展空間，因為六成港人都鍾意民主，不過，民主派現時被公投議題牽住鼻子走，方向錯晒，要馬上叫停，因為咁搞只會同中央關係愈來愈差，但卻改變唔到事實。
飛哥反而建議，泛民主派要準備○七年推舉一個人出嚟選特首，好處係，欽點嘅候選人要面對公開辯論，唔可掉以輕心，又可以畀公眾監察，中央都會重視。飛哥心目中三個最佳人選，有李柱銘、余若薇同鄭大班，當中以擁有國際知名度嘅李柱銘最好，鄭大班則衰在太霸道，做民主派派鞭啱啲。
傳真︰2623-9278
電郵︰