被種族歧視可以拉隊唔踼<br>球驗客手記:阿仙奴明天有主動權!?

被種族歧視可以拉隊唔踼
球驗客手記:阿仙奴明天有主動權!?

近期球場種族歧視問題成為熱門話題,日前國際足協會長白禮達亦出嚟抽水,話遇上英格蘭國家隊友賽作客西班牙時,球員俾球迷用種族歧視字句辱罵嘅情形,應該拉隊走人。佢重話喺星期三英超阿仙奴作客荷蘭燕豪芬呢場歐冠盃分組賽生死戰中,一有球迷侮辱阿仙奴嘅黑人球員,阿仙奴亦可以拉隊走人!
雖然種族歧視係唔啱,但白禮達咁講我求大俠就戥燕豪芬驚,萬一喺佢哋贏緊時,阿仙奴球迷嚟一招無間道,混入燕豪芬球迷唱種族歧視嘅歌,咁阿仙奴拉隊走人被判以二比○或者三比○勝出,咁燕豪芬咪好唔抵?另外,阿仙奴領隊雲格又有冇吉士真係拉隊,而拉隊之後阿仙奴係咪真係如白禮達所講會被判勝出呢?
其實白禮達講得就講已唔係第一次,之前佢話女足波衫要性感啲,又亂出嚟解釋球員慶祝入波時點樣掀波衫先要畀黃牌,𠵱家又叫人比賽中拉隊,咁天寒地凍捱夜睇緊直播嘅球迷好難受啫!

俾銀仔擲中冇發火韋斯EQ暴升
講到唔好老脾嘅球員,英冠聯球隊米禾爾領隊兼球員嘅韋斯絕對係代表人物。不過佢最近就改進咗唔少,好似喺啱啱嗰個禮拜日米禾爾對韋斯咸嘅英冠倫敦打吡中,韋斯雖然俾韋斯咸球迷擲銀仔打中,當大家以為一定有好戲睇嘅時候,韋斯佢竟然冇發到脾氣,重好有風度咁將個銀仔畀咗一名韋斯咸小球迷,結果引嚟全場掌聲,而最後米禾爾重贏埋一比○㖭。

佩雷斯反應慢半拍教練算盤打唔響
前日意大利盃卡利亞里贏拉素,難得喺新收費台見到蘇拿、迪肯尼奧同埋佩雷斯呢啲上一輩嘅名將同場獻技。其中蘇拿後備落場之後都幾生猛,最後重射入奠勝十二碼;佩雷斯就大出洋相,上半場睇住主隊球員蘭祖拿由中圈推個波嚟射個無乜勁度嘅地波,自己反應慢半拍,落得地時個波已經入網。拉素教練卡素想搵呢場盃仔提升佩雷斯信心嘅如意算盤,似乎打唔響噃。

出口術博唔使賠巴勒莫炒人要秤過
巴勒莫上個禮拜六喺意大利盃輸畀AC米蘭後,個有錢佬會長森柏連尼放晒風到季尾一定炒教練古杜連魷魚。佢咁講擺明想古杜連冇面自己劈炮,唔使賠,生意人果然係生意人。至怕係古杜連賴死唔走之餘,未來唔盡全力教番好隊波,搞到成績差咁就捉蟲囉。古杜連會自動辭職定臉皮厚唔走就暫時未知,不過計我求大俠話,如果森柏連尼真係為隊波好,其實早啲補水炒人啦。