外圍股市唔多好睇，但港股仍炒得火熱，尤其係澳門賭業概念股，幾乎全部都升唔停，升幅動輒以5成以上計算，而且有成交配合，唔係乾升，真係睇見都心寒。
經紀陳話，江湖傳聞呢類澳門賭業概念股，吸引咗好多濠江賭業中人來港炒作，佢哋有財有勢，大把水將股仔炒起，只不過一般散戶唔會知佢哋幾時會散水。
與其係咁，小初情願搵啲大家都睇得通嘅股票嚟玩，經紀黃就推介美聯物業（1200），佢話地產市道持續熱鬧，無論二手盤抑或一手盤都持續受到追捧，物業代理實在冇理由唔賺錢。
雖然美聯股價近日又創新高，但經紀黃話有外資行分析員睇過，若以未來盈利計算，家陣股價仍然便宜，況且美聯公司手頭現金大把，計落有成3億銀咁多，有機會派特別股息。
美聯股價近排走勢甚佳，噚日升5.85％，收4.525元，成交股數924萬股，金額4080.5萬元。
慕容小初