應咗上禮拜六條題，炒輪三更閉翳四更富貴。昨日推介新地C輪2276，夠膽低位42.5仙上車，埋單48.5仙，執14%。新地（016）跌1格，跑慢過長實（001），好快跟番上去，揸新地C輪2276有着數。夠膽喺低位撈長實C輪2249，上車價52仙，埋單價66仙，有膽有錢者執27%。長實個勢靚，帶住個市上，本身熱門C輪2249同2258騰飛可待。
滙控C輪：上禮拜五美股散落去，日股昨日跌233點，港股能夠由跌158點變為升12點，顯示市底掂檔。一旦外圍醒番，港股醒嘅程度將會放大幾倍。滙控（005）成日好穩定，最低價131.50元（跌1元），埋單132.50元，冇升跌。個市一旦回升，滙控個領導股地位唔會有變，明日除息1.01元，遠期C輪由輕微負溢價變為輕微溢價，反映真實情況。滙控習慣除息冇耐上番去，揸滙控好易先賺息，跟住財息兼收。𠵱家買C輪係時候，第一主角係4441。
恒指C輪：個市跌唔落，未必代表會直接上升，間中反覆吓好正常，反覆過程中，失驚無神跌落去之時，買啲恒指C輪有機搵錢。4442同4444一對孖寶係正印主角，有時4442靚啲，有時4444靚啲。𠵱家，係4442靚少少，因為4442噚日跌1.8%，收22.3仙，而4444則升0.9%，收23.3仙，變咗4442嘅溢價低少少，槓桿率高少少。兩隻輪都係明年3月底到期。
中銀C輪：中銀（2388）跌5仙。中銀慢火煎魚，個勢向上，慢慢收集C輪9169，明年2月夠鐘，溢價0.2%，槓桿率6.6倍（有效6.6倍），引伸波幅1.9%，唔錯。
章盛