黎姿在無綫台慶中撼低鄧萃雯獲「我最喜愛的女主角」獎，惹來觀眾不滿及投訴，影視處更接獲一百零五宗投訴，指賽果造馬有欠公平，不過黎姿昨日在無綫直播節目中獲高層力撐，而她與觀眾直接對話時不斷為自己辯白，更忍不住哭成淚人。
深得觀眾歡心的《金枝慾孽》「如妃」鄧萃雯，上周角逐無綫台慶「本年度我最喜愛的女主角」獎項時大熱倒灶敗給黎姿，結果惹來不少觀眾及網友不滿，狂轟無綫漠視民意，有造馬之嫌，影視處昨日亦接獲一百零五宗投訴，內容全是投訴無綫女主角獎造馬，賽果有欠公平。
有見及此，無綫兩大紅人總經理陳志雲和製作資源部副總監樂易玲，昨日特別與黎姿出席節目《香港直播》，向觀眾解釋。陳志雲解釋今次選舉機制，互聯網及觀眾投票各佔百分之三十，其餘百分之四十由無綫評選工作委員會評選。其後主持接聽觀眾電話，一位羅先生說：「希望100%都係由觀眾投票，40%係你哋公司左右大局，都唔係真正反映到民意。」
陳志雲回應說：「黎姿同鄧萃雯嘅分數其實好接近，佢哋唔係全民直選出嚟，係專業推介，或者出年我哋增設一個觀眾投票嘅獎項。」而樂易玲則以蔡少芬、汪明荃、鄭裕玲及張可頤等過往獲獎女星為例，指並非無綫經理人合約藝員才有機會獲獎。
其後黎姿接受主持訪問，並與觀眾對話，一位自稱是她師姐的歐陽小姐大讚黎姿是當年校花，並有留意對方所主演的電影和電視劇，她認為黎姿演技愈來愈進步。未知是否因為終於有觀眾力撐，黎姿聽罷竟即時淚如泉湧，一發不可收拾。
黎姿邊哭邊回應說：「我個樣生得成個公仔咁，身材比較突出，我一直好努力做戲，但一直冇一個好機會，今次《金枝慾孽》我好畀心機去做，亦好珍惜呢個機會，多謝支持我嘅人。由攞獎至𠵱家，直至今日我至係第一次喊，當晚着到咁靚，我唔想梨花帶淚，所以強忍，直至呢個電話，我真係好感動。我想澄清，我未同ＴＶＢ傾過經理人合約，對是非我完全唔理會，我喺呢個圈十幾年，有是非唔係第一單，以前更大單都試過。」
黎姿在節目完畢後接受訪問，問她被指非實至名歸會否感到難受時，她說：「唔難受，每個人喜好都唔同，世界上唔會有一個人得到全世界人認同，食嘢個個口味都唔一樣，就算宗教信耶穌都係咁。」日前有支持鄧萃雯的網友聲稱會在昨日到無綫拉橫額抗議，最後卻未見影蹤，對此黎姿說：「支持自己偶像好正常，黎明同劉德華啲fans都係咁，雯女好nice，好有愛心，係虔誠基督徒，我喺佢身上學到好多嘢。」黎姿曾承認曾與無綫洽談經理人合約，何以現在反口不認？黎姿說：「可能當日我誤會咗大家嘅問題，我係指同無綫一年續一次嘅部頭合約啫。」
另一方面，鄧萃雯昨日接受電話訪問，對於影視處接獲過百投訴，她說：「我好衷心多謝大家愛戴得我咁肉緊，但我唔希望大家太肉緊而死好多細胞。我同黎姿唔係你死我活，唔好寫到我哋不和咁啦，其實講到話鬥乜鬥物，要鬥嘅話不如同韓國、日本同內地鬥，我哋香港演員團結啲，做好香港製作，等香港製作喺外地攞番個席位重好啦。」而鄧萃雯緋聞男友鄭嘉穎昨日在北角拍攝新劇《YummyYummy》，問他會否安慰對方，鄭嘉穎說：「雯女壓力太大，曾經喊過，但係冇所謂，佢都有個獎，得到觀眾認同都好難得，雯女唔使我開解，佢重識開解過我。」
此外，上周五無綫台慶平均收視高達三十五點，即二百三十萬觀眾，而公布「男、女主角」獎部份，收視更高達三十九點，觀眾人數達二百五十六萬。而陳淑蘭昨日主持電台節目《娛樂滿天星》期間，提到無綫台慶即激動地說：「話明我最喜愛，就應該順應民意，如果最後都係內部評審決定，不如改名做『最想力捧男、女藝員』，或者『最忠心男、女主角』。我覺得鄧萃雯雖敗猶榮。」DJ李志剛更揚言遊行抗議。
採訪：卓美娟、戴彩煥
攝影：何國豪
