馮仁昭四圍超：
發哥冇改錯名老婆又中六合彩

周潤發真係厲害，除咗自己紅之外，連佢老婆發嫂亦鴻運當頭。早兩日馮仁昭撞到發嫂嘅細佬，聽佢講先知發嫂又中六合彩，馮仁昭即刻打電話恭喜佢。
發嫂話：「其實都唔係我一個人中，係幾個朋友買，叫我夾埋一份啫。諗唔到咁好彩又中咗三獎，派彩六萬幾，四個人分，每個人贏得萬幾蚊，而我自己嗰筆彩金，會攞嚟做善事。上天對我同老公已經好好，所以呢啲幸運之財，我會用嚟幫人。」

明年還片債
發嫂已經係第二次中三獎，真係好有橫財運。發哥拍戲成日做賭神，但佢對賭就冇興趣，生活健康到你唔信，每晚十點上床瞓，七點起身做運動，下晝就去影相，但呢啲咁悠閒嘅生活到出年就可能要改變，因為美國嗰邊催佢開工啦！出年發哥要拍三部戲咁多，馮仁昭都唔知佢點捱。

高峰媽媽要孫唔要乸
高峰同那英啱啱幫個仔擺完滿月酒，法庭就證實咗王納文嘅仔王聖元真係高峰嘅骨肉。內地記者最近聯絡咗高峰嘅媽媽，佢重好坦白咁話：「是高家的血脈我們當然會養，這個孫子我們還是要認的。」但一講到將件事搞大嘅王納文，高媽媽就鬼咁嬲，重話希望可以接個孫返嚟自己湊，佢話：「為了錢不顧孩子的媽媽能照顧好孩子嗎？」

陳嘉容入院割子宮瘤
早排親口承認子宮生朱古力瘤嘅名模陳嘉容，向傳媒大方咁透露自己入院割除朱古力瘤嘅日期，噚日佢就喺髮型師男友RickyKwok嘅陪同下，去咗港安醫院辦理入院手續，不過可能係因為入院太緊張嘅關係，陳嘉容唔肯接受訪問。馮仁昭都希望佢早日好番啦！

章子怡眼腫狂打噴嚏
正喺洛杉磯拍緊《藝伎回憶錄》嘅章子怡，因為劇情需要，要戴有色隱形眼鏡，但佢第一日開咗十二個鐘頭工後，就因為對眼太乾，差啲除唔到對眼鏡。經醫生檢查後，原來係因為章子怡眼睛過敏，戴隱形眼鏡時會搞到對眼紅腫同痕癢，最慘呢樣嘢重影響埋佢鼻哥，搞到佢連打二十幾個噴嚏，要經理人漏夜陪佢去睇醫生，認真當黑！

at17特訓克服挑戰
女子組合at17同林一峰等人前日喺天水圍濕地公園出席「Nike十公里挑戰賽」，佢哋為咗應付比賽，事前經過五星期嘅艱苦訓練，at17成員林二汶雖然喺賽前信心只得一半，但最後亦能夠順利完成比賽，令佢非常興奮。

楊思琦性感熱爆氣球
楊思琦早排拍攝纖體廣告時，除咗着咗一條低胸迷你裙，勁騷34C、23、33.5嘅標準身形外，重梳埋一個爆炸頭，造型極之冶豔，思琦話：「今次嘅冶豔形象係我嘅新嘗試，我覺得幾特別。」拍攝時，布景氣球突然間爆咗，嚇到思琦花容失色。最衰佢男友李永豪唔喺度，唔係上演一齣英雄救美都唔錯喎！