拍賣，唔一定係有錢商家「舉手仔」的玩意，今時今日你都可以做賣家，將自己最珍而重之嘅物品陳列在互聯網上，讓一眾有心人「爭餐飽」，好不架勢！這平民化的商業活動，藉着下周三是雅虎拍賣5周年紀念，將會變得更有意義。各界明星傾力捐出心愛物品，為兒童癌病基金出點綿力，讓網民們Bid個夠之餘又可做善事，一舉兩得！
記者：何善華
攝影：周旭文
講網上拍賣，自1999年Yahoo!拍賣成為首個香港網上拍賣場啟用至今，每月用戶人數已超過四十萬人次，而拍賣物品的數目亦遞增至100萬件。在小小的家園中自創我天地，上載割愛產品等周轉套現，或輕鬆瀏覽當走一趟NetShopping。今天，為慶祝Yahoo!拍賣成立5周年，更廣邀城中名人及歌手捐贈珍藏物品作網上慈善拍賣，義助兒童癌病基金籌募經費，多添一份神聖意義！
「埋嚟睇！埋嚟揀呀！」今次雅虎拍賣的所有慈善物品，分5階段進行，每階段都有各式筍貨，還有由名人明星捐出心愛物品，讓歌迷及其愛戴者爭相競投。每件產品的拍賣時間為7天，並以$1為底價，由下周三開始讓各位網民隨意競投，各位網民定必要儲足銀彈，因為競投次數不限，有本事可以悉數買返屋企慢慢拆！
由eBay開始，現時已累積10年網上拍賣經驗的Raymond表示，想將心頭好據為己有，首要條件必須投放多些時間在電腦上，又以講古佬嘅口吻提供了三招「十拿九穩」的網上拍賣必殺技，放於任何網上拍賣活動皆準也。
「無論睇唔睇中件物品都好，都唔可以用試價及一蚊一蚊形式嚟刺探軍情，因為愈多競爭者就變相愈低機會競投成功，唔可以俾其他人知道又有多一個局外人睇中件貨，抱住旁觀者的角色，再伺機出擊。」
「坐這山望那一山，一事無成！同一時間唔可能分身太多件物品，如果已經有心目中嘅拍賣物品，就要專心一意睇住件貨嘅波動情況，若果發現競爭者太多的話，必要時要砍尾唔好再Follow啦！」
「Yahoo!香港唔會好似其他拍賣網站咁，最後30秒有人出價又再加多5分鐘！所以，臨尾3分鐘係最關鍵時刻，養兵千日用在一時，最後30秒可以突如其來推高當時價錢，其他競爭者猶豫是否再出價之時，拍賣遊戲已經結束，我就成為大贏家了！」
11月30日至12月6日
筍貨推介：港龍航空東京來回機票2張、Rolex手表、Burberry手袋、Tiffany首飾。
楊千嬅捐贈物品：LV及agnesb.銀包各一個
「我捐出LV及agnesb.呢兩個牌子出嚟，因為本身自己都好鍾意，各有各特色！所以我都希望我嘅歌迷同埋支持者可以分享我的喜好。」
莫文蔚捐贈物品：張國榮97演唱會紀念風褸
「其實我本身都係哥哥Fans，97年哥哥開演唱會我都有份做嘉賓，而歌迷會一向都熱心幫助兒童癌病基金，件風褸我好珍而重之，但今次拍賣籌得的善款可以幫到有需要嘅小朋友，真係好有意義。」
12月7日至13日
筍貨推介：直升機環繞港島遊、最新系列Blythe公仔、星球大戰Lego
古巨基捐贈物品：親筆簽名完全限定版《thestoryofkubi》
「今次捐出嘅係我最近一年親自創作嘅個人作品，我好相信如果做人有恒心，就一定可以成功，希望我嘅支持者可以領悟到當中嘅道理！」
12月14日至20日
筍貨推介：Resort度假Package、無印良品最新系列摺合單車、adidas經典Jacket（非賣品）
Cookies捐贈物品：Cookies設計米奇老鼠Tee（Serial#001）
「希望將自己最有心機設計嘅物品捐出嚟，幫助有需要嘅人，而且每件米奇老鼠Tee都係001號碼，好罕有！」
12月21日至27日
筍貨推介：住宿半島酒店一晚、SK-II護膚品套裝
蔡瀾捐贈物品：廿年珍藏荔枝茶壺、自畫旅行篋
「荔枝茶壺我收藏咗廿幾年，與其擺喺度，不如捐出嚟做善事幫助有需要嘅人。」
吳日言捐贈物品：1比1親筆簽名紙型公仔、親自下廚豐富美食
「人形紙板係非賣品，為咗紀念我喺今年5月份推出嘅首張個人大碟，同埋大家都有機會食到我親自下廚嘅美食，你哋夠唔夠膽先！」
12月28日1月3日
筍貨推介：無印良品$1,000家品禮券、Nokia7260、iPodPhoto、Canon數碼相機IXUSi
成龍捐贈物品：8R簽名相片、《警察故事》系列DVD親筆簽名
「如果我們世界上每個人可以關懷身邊嘅人、愛護他們，付出少少嘅時間給予有需要人士，那麼世界會更美麗了。」
章子怡捐贈物品：紐約電視節時使用的Ferragamo披肩
「Scarf係我近期最鍾意嘅服飾，去唔同場合都可以配襯得宜，好開心同各位志同道合分享一下。」
Yahoo!拍賣5周年慈善拍賣
網址：
日期：2004年11月30日至2005年1月3日
內容：分5星期進行的慈善拍賣活動，每件產品會以港幣1元底價拍賣，7日內以價高者得方式競投，惟參加者必須為Yahoo!香港的網上會員。
