靚女C係時裝專家，一個月去東京三四次，搜購新款女裝，辦貨返香港賣。佢喺尖沙嘴開咗一間樓上boutique，專做OL嘅生意。佢話歐洲名牌太貴，日本牌子最合本港中產女性口味喎。
呢日佢間大廈裝修外牆，下午三時許，舖頭內突然停電，靚女C與三個女售貨員手足無措，打電話去管業處，冇人聽電話。剛巧舖頭外面有一個男人，穿恤衫西褲，正在頭岳岳，做緊windowshopping，男人話：「乜咁啱㗎？係唔係跳fuse呀？叫人整啦。」靚女C話：「我哋幾個女人唔識電器，管理處又冇人。」男士自告奮勇話：「好易搞掂啫，我可以幫你睇吓。」靚女C猶疑之際，因冷氣停咗，好焗，粉額流汗，於是話：「唔該晒，請你幫吓手。」男士入到去錶房，摸咗一輪話：「嗱，一兩個電掣壞咗，隔籬條街就有間電器舖，如果你真係要，我可以幫你去買零件，半個鐘頭就掂。」靚女C話：「好吖、好吖。」
男士好快買咗零件上嚟，十五分鐘就整好，全間舖頭恢復供電，女士一齊歡呼：「好嘢！」男士話零件用咗三百五十蚊，靚女C當然即刻畀番錢佢，磅多一百皮貼士，多謝一輪，跟住問佢攞番張購貨單，男士話：「唉吔，趕得滯，唔記得攞，我落去攞番張單畀你。」出咗門口，去如黃鶴。
臨收舖之際，負責裝修監工嘅工程師經過，靚女C同佢講番呢件事，工程師話：「邊度有咁巧合嘅事㗎？有可疑，等我同你望吓。」一望，啲零件既殘且舊，一睇就知道係執返嚟嘅舊貨，斗零都唔值。
唔知係唔係因停電冇冷氣以致焗親，靚女C第二日要去土瓜灣睇醫生，同護士講起，護士話：「哎吔，我哋醫務所上星期又係突然停電，碰啱有兩位男病人入到嚟登記睇醫生，話可以同我哋修理，情況同你所講完全一樣呀！我哋畀咗一千蚊㖭，後來先知道，啲零件原來係好殘嘅！」