亞太經合會議，阿董獲安排親自去胡錦濤間酒店早餐面聖（阿胡見客今次擺晒款，要各國領袖上門去佢間酒店見佢，獨係美國總統布殊夠惡，傳召番阿胡嚟自己住嘅嗰間酒店，可見呢個世界係幾現實），阿胡降旨（乜唔係基本法講明，中央不干預特區施政咩？）下令阿董，因國家屍扒相助，香港有咗少少繁榮及穩定，不過今後要「把發展擺在首位」以「發展」為優先！
不過，阿董就算領咗旨，都冇乜作為咯，點解？因為佢剩番兩年零，就算有乜「發展」雄圖，都唔到佢爭先領籌！呢，唐唐啲天地線果然厲害，佢一早就霸咗成座大嶼山，話要建美式主題公園，又要填陰澳搞個「物流園」，並念念有詞複述死鬼老鄧生前嗰句「發展係硬道理」，證明唐唐一早喺阿爺聖殿經已收晒風，揸住「發展」兩個字，將大嶼山做踏腳跳板，過兩年就一腳噬起阿董，空降禮崩府，並順手將禮崩府正名為「特首殿」，舉行登基大典嘞！
之但係，阿胡呢句「把發展擺在首位」，一嚟冇新意，二來亦分分鐘害死香港㖭！成個大陸，二十幾年來，就係揸住「發展是硬道理」呢句鄧某聖旨，污染山河，破壞生態，黃河斷流，長江變咗化學廢料嘅七彩坑渠，摧毀三峽，跟住重要將隻毛手伸去雲南，喺怒江起水壩，大陸有識之士都頂唔順，紛紛抗議！
既然「發展」係硬道理，「發展」要優先，咁年年自稱百分之九點幾嘅經濟增長咪正囉？咁又點解要溫寶出嚟「宏觀調控」，又話盲目發展係大量浪費基建資源？
特區豆膶咁細，一無實業，二冇科技，阿胡話「把發展擺在首位」，「發展」啲乜？阿胡冇講到。八方解畫，只有三樣可以發展：第一係地產，第二係賭波，第三就係淫業嘞！
之不過，阿董一早就用「八萬五」毒招窒息咗地產業發展，現時好似有少少知錯，叫地產商「發展」番西九龍娛樂區，可惜為時已晚，遭到文化界破口大罵，話係向地產商輸送利益！
至於發展賭波，董團夥俾啲道德團體喝兩喝，心慌意亂，舉棋不定，卒之搞到最近先至畀馬會接辦。發展賭業，田少亦有新諗頭，叫唐唐喺大嶼山起賭場，實行同澳門何爭客，睇嚟遲早家嘈屋閉，要阿胡出頭主持公道嘞！
至於淫業方面，警方近日喺砵蘭街掃黃，打擊西九龍家禽業發展權，咁樣做會唔會係違抗咗胡總指示？睇嚟阿董回港之後，都要搵高佬李傾吓。
傳真︰2623-9278
電郵︰