《原罪犯》韓國再奪五大獎<br>李英愛黐實名導博封后

《原罪犯》韓國再奪五大獎
李英愛黐實名導博封后

由韓國知名導演朴贊郁執導、實力派演員崔岷植主演嘅《原罪犯》,喺韓國國內同國外先後獲得唔少電影大獎,喺前日宣布嘅第二十四屆韓國影評大獎結果入面,《原》片囊括咗最佳電影、最佳男主角同最佳導演等五個大獎,成為大贏家。
《原罪犯》面世以嚟已經喺世界各地大獲好評,今年初已經喺康城獲得昆頓塔倫天奴(QuentinTarantino)等評判團嘅青睞,而前日韓國電影評論家協會就公布咗後日舉行嘅第二十四屆韓國影評大獎得獎名單,《原罪犯》再一下城,除咗得到最佳電影、最佳音樂之外,導演朴贊郁則獲得最佳導演、崔岷植獲得最佳男主角,而姜蕙姃就獲得最佳新人女演員。

《太》片奪兩獎
而另一部揚威威尼斯電影節、由金基德執導、李丞涓主演嘅《3-Iron》就獲得最佳劇本,至於元斌同張東健主演嘅《太極旗飄揚:生死有情》就奪得最佳攝影同最佳技術兩個獎,最佳女主角就由《TheBigSwindle》嘅廉晶雅奪得。
曾經喺《JSA共同警備區》同朴贊郁合作嘅李英愛,最近就為朴導演嘅新片《親切的金子》,親自去咗漢城江南昌一間麵包舖學習整蛋糕,因為佢要喺片中飾演蛋糕設計師一角,喺戲入面重要坐監㖭。李英愛今次再同朴贊郁合作,佢大有機會好似崔岷植咁攞咁多獎。