未來個零月對施根非常重要。如果佢再畀唔到信心阿仙奴領隊雲格，就算佢同雲格係法國自己友，相信都冇得留低。
自從蘇甘保上月下旬對曼聯整親小腿，唞到𠵱家都未出得番，故雲格就用施根頂蘇甘保個位。但施根幾乎場場揩嘢，除咗喺上場歐冠盃擺烏龍，搞到俾彭拿典奈高斯迫和一比一外；上場英超聯對西布朗又孭鑊，令球隊唔見咗兩分。
話說呢個光頭中堅助攻近門頂高，令阿仙奴唔可以將比數拋開至二比○；轉個頭，佢因跳頂時間唔準而解唔到圍，俾西布朗嘅艾恩梳射入追成一比一。
喺九八/九九球季，韋華斯因睇唔住哈索賓基俾佢頂入，令阿仙奴輸○比一畀列斯，將英超冠軍輸畀曼聯，翌年即被打入冷宮，之後被送到國米做大後備。況且，阿仙奴喺明年一月有象牙海岸守衞伊保爾加盟。所以施根嚟緊一個月若再踢唔到爭氣波，我求大俠敢大膽講句，佢可以執定包袱。
車路士前晚俾查迪一腳射爆，搞到除咗俾保頓迫和二比二之外，重喺今屆首次失兩球。唔講你唔知，查迪係首位到英超搵食嘅突尼西亞國腳，佢原來亦係強隊剋星，之前就分別喺阿仙奴同熱刺身上入波，幫保頓打和同贏波。查迪咁掂，話唔埋可以幫同鄉有機會去英超聯搵食。
前晚列斯喺英冠發威，大勝作客嘅昆士柏流浪六比一。三十六歲嘅甸尼「大四喜」，證明佢老而彌堅，重同後生仔希利好有火花。話時話，昆士柏流浪亦有老將科朗撐場，而呢位三十六歲前鋒重勁，今季入咗十一球。啲老人咁勁，唔怪得成五十歲嘅蘇古迪斯都復出踢波啦！
烏甸尼斯前晚喺意大利盃對萊切，喺落後三球下反勝五比四，但咁到未算奇，原來呢場波入兩粒嘅烏甸尼斯前鋒迪米捷利，喺補時代替被逐嘅漢丹洛域把關，重救埋萊切胡仙歷嘅十二碼，令對方無法追平五比五。迪米捷利守龍門守得咁掂，唔知烏甸會唔會喺下場畀佢守龍門呢？
NBA嘅溜馬隊打交打到冇咗三位主力，加埋傷兵陣容冇咗半支球隊，噚日佢哋對魔術場波剩番六位球員應戰，唔輸有鬼！睇怕溜馬嗰三位球員至少都要罰停賽十場以上，但想乘機發溜馬運滯財嘅球迷都唔使諗，因為可以預計莊家未來一兩個月都怕且唔會同溜馬開盤啩。
逢周一至周五見報