呢期除咗澳門賭業概念股之外，小型地產股亦有開車迹象，上周五泛海集團（129）出現一宗大手成交上板，據經紀黃講係有一個芬佬要貨，主要睇中泛海股價較資產淨值折讓大。
泛海的大手成交在上周五早市出現，每股造0.34元，為數8000萬股，跟住泛海股價就開始急升，最高見0.41元，收0.405元，大升10.96％，計埋嗰手交叉盤，成交股數高達1.92億股，金額7156萬元。
截至今年3月，泛海每股資產淨值0.84元，但股價長期維持在0.40元樓下，相當唔合理，但偏偏泛海向來難炒，次次股價一炒上，就會出現好多沽盤將股價推低，實在令捧場客氣餒。
經紀黃解釋，一來係炒家短癮，二來係隻股過往業績平平，基金經理唔多鍾意。不過，泛海今年賣咗唔少樓，當中包括淺水灣豪宅項目，即將在12月份公布的中期業績，據講有望轉虧為盈，所以泛海不乏炒作藉口，如果今次有芬佬齊齊玩，走勢將會唔同晒。
慕容小初