上周五紐約油價彈升，美股回落，港股今早會有啲壓力，但年底例旺，港股跌啲正好帶來低價買C輪之機。
新地C輪：港府首次公布，未來兩年有6.3萬個私樓單位推出，裏面便有1.5萬個係以前起好嘅貨尾。
不過，新世界（017）早前攞到嘅紅灣半島2470單位，包括喺呢1.5萬個之中，紅灣半島拆建多過唔拆建。又有啲地產公司嘅死火樓，賣極都賣唔去，又或者當有寶咁唔願賣。
所以實際上供應單位數目會比較港府公布之數少好多，對樓市有利，地產股繼續有運行。即係話，新地（016）睇好，新地C輪要買。
新地C輪阿一之選本來係2252，佢嘅數據靚啲，不過上周五已先升2仙，而本來阿二之選2276則跌1仙，所以2276做番阿一之選。2276明年3月到期，輪價48仙，溢價2.3%，槓桿率16.3倍（有效9.9倍），引伸波幅22%。
中電信C輪：網通（906）新登場，收9.40元，高過招股價8.40元足足1元。國內電訊股前禮拜升定先，上禮拜有少少回吐，估計喺網通帶動下，短期有機會再造好。
業務最接近網通嘅中電信（728），全周跌2.5仙，主角C輪4577全周跌夠5仙，跌幅13%，跌突咗啲，可以諗吓博反彈。
隻輪明年6月到期，輪價32.5仙，溢價7.2%，槓桿率8.5倍（有效5.1倍），引伸波幅33.9%。講數據，4499靚過4577。
國泰C輪：國泰航空（293）若然因油價上升而下跌，趁低買C輪，對象係9170，年底到期，輪價15.5仙，溢價1.1%，槓桿率9倍（有效7.4倍），引伸波幅34.7%。
章盛