老牌屋苑鰂魚涌太古城，第一期翠湖台近三十歲，唔少長情業主，開始陸續沽貨離場，好似太湖閣中層H，六百八十呎，望海，業主住咗二十一年，剛以二百四十萬賣出，每呎三千五，賺近二百萬。因為同區冇乜新樓選擇，惟有喺外區搵過個竇。
利記馬忠強話，翠湖台由於間隔四正，實用率重有九成，加上入場費平，二百零萬有交易，因此仍有承接力。好似呢個太湖閣單位買家，住開東區細樓，今次諗住換樓。
馬忠強話，始終翠湖台樓齡有番咁上下，所以成交一向唔多，通常一個月只有三五單，即使九月大旺市，太古城共有逾百宗成交，佢都係得三宗。
𠵱家太古城放盤有七百三十個，每呎叫價五千三。本月至今，成交暫時得四十零宗。
豪宅捧場客大有人在，除咗啲熱門盤外，早於九月份已經接受洽購，由百利大發展嘅山頂道八至十二號豪宅項目，噚日終於錄得首宗成交。
利記廖偉強話，第一個賣出嘅，係A2座六樓B，二千九百呎，成交價近五千五百萬，接近萬九蚊一呎，同發展商之前公布嘅意向呎價二萬，已經相距不遠。
蘭西記得，呢個項目年幾前差啲俾銀行接管，搞咗好耐，先至推得出。今次首錄成交，真係可喜可賀。
上市公司國中控股喺內地首個房地產項目，湖南長沙「國中星城」，第一期「萬國商業廣場」八月推出，至今賣出六百三十八個舖位，套現二億。
究竟個商場有幾大，原來有一千零四十個舖位，比起香港啲商場，係咪好似巨無霸呢。
「國中星城」共分三期，除大型商場外，重會有酒店同服務式住宅。
呢個商場，八月底喺本港推售，重以「你消費，我供舖」做招徠。
東方魅力，係其中一間進駐該場嘅公司，較早時重派埋明星，去長沙參加銷售中心開幕典禮，夠晒畀面。
公司網頁，已經係必需品，但時代轉變迅速，好易過時，要不斷update。蘭西最近上新鴻基地產嘅網頁，發現已經換上新裝。
首頁只有一張大相，感覺冇咁花呢花碌，重將順勢做埋樓盤宣傳㖭，夠晒慳皮。
至於租售物業以及優惠連結，都一樣放埋喺首頁度，唔使慢慢搵，費時失事。
最特別係連「新地通勝」都喺埋同一頁，唔知係咪呢頁好受歡迎，收視率極高呢？
發展商搶奪市區靚地皮，出價好進取，唔少業主手上嘅地皮好似變成「皇帝女」，實行啱心水至賣。
裕泰興西環干諾道西一一九至一二○號酒店地盤，較早時標售，原定十二月二號截標，但係𠵱家代理中原話，因應市場要求，截標日期押後兩個禮拜，至十五號。
中原話，今次係首輪招標。咁係咪重有第二輪，甚至第三輪呢？
個地盤近二千七呎，屬商住用途，但已經獲准起一幢三十三層高酒店，樓面逾四萬呎。
裕泰興羅守耀曾經話過，若以連建築工程形式出售，相信值億五。
今年有多幢酒店易手，最矚目嘅尖沙嘴九龍酒店，上個禮拜截標，可見酒店買賣幾咁活躍。
電郵地址：
