饒舌歌手Eminem貴為美國樂壇天之驕子，自然不乏美女投懷送抱，一名蘇格蘭女子金芭莉（KimberlyLee）最近就向英國報章爆料，話過去佢曾經同Eminem共度春宵，而且Eminem同佢做愛期間重不斷rap歌，令金芭莉覺得自己好似聽緊私人演唱會咁。
金芭莉透露自己出席由KidRock喺洛杉磯一酒店搞嘅派對入面認識咗Eminem，當晚Eminem一見到佢就暈晒浪，重帶佢上房幽會，據知佢哋喺十二個鐘內做愛四次。金芭莉盛讚Eminem身形好靚，而且重識點樣滿足女人，Eminem重提到佢嘅人生同成名帶嚟嘅壓力，佢重話佢個囡囡Hailie係對佢最重要嘅。而呢個叫做金芭莉嘅女子，個名重咁啱同Eminem前妻撞到正。
另外，Eminem嘅新大碟《Encore》已成為英國有史以來賣得最快嘅大碟，呢張碟頭兩日喺英國已經賣咗十二萬二千幾張，呢個走勢同佢喺美國三日賣七十一萬一千張嘅情況真係不遑多讓，BritneySpears同Westlife嘅大碟就分列二、三位，而Eminem原來前晚重喺倫敦搞咗一個好神秘嘅迷你演唱會，只有五百五十個歌迷有緣睇佢表演。