許志安、容祖兒（Joey）、達明一派同台灣歌手張震嶽等，前晚喺沙田馬場錄影無綫節目《全天候馬匹亮相圈揭幕大滙演》。Joey同許志安演繹其他歌手嘅舊歌時，不但咪嘴，而且重完全夾唔到口形，馮仁昭覺得佢哋身為歌手，咁差勁嘅表現就認真唔專業。
Joey演繹葉蒨文嘅《憑千個心》，安仔就演繹「歌神」許冠傑嘅《最緊要好玩》，佢哋重合唱梅艷芳同李中浩嘅《邁向新一天》，由於唔係自己嘅歌，佢哋就唱得好生硬，錄影時重夾唔到口形，不過當唱番佢哋自己嘅歌時，就可以唱番live，表現比較自然。相對於Joey同許志安，張震嶽就專業得多，佢唱得有板有眼，所以咁多歌手之中，張震嶽最受現場歌迷歡迎。
馮仁昭喺完騷時拉住準備走人嘅Joey，問佢甩嘴原因，Joey笑住話：「有啲位我入唔到，唔記得咗囉。通常唱人哋啲歌會咪嘴，自己唱時會有啲緊張，但唱番自己嘅歌就會唱live。」
林熙蕾昨日陪媽咪到泰國參加海邊婚禮，林媽媽難得露臉，所以一出場母女即刻俾人話似一對姊妹花。婚禮中嘅賓客對林媽媽話：「原來林媽媽這麼漂亮，所以才會生出這麼漂亮的女兒。」而林媽媽重趁機向林熙蕾催婚㖭，佢話：「我最大的心願是希望蕾蕾趕快嫁掉！」
內地演員李冰冰前晚同鄭中基一齊出席喺金鐘舉行嘅「美亞電視劇台」記者會。李冰冰同鄭中基之前合演古裝喜劇《折扇探花》，李冰冰用國語話：「我跟鄭中基合作得十分愉快，他很不錯。但最不明白為何香港不少女演員跟他合作都會傳緋聞。」咁樣講法，唔通李冰冰都好想同鄭中基傳緋聞？
吳文忻噚日同譚耀文、黃榕等喺上水出席一個新樓盤舉行嘅活動，其間大會重安排咗試車活動，吳文忻就索性揸住架跑車兜風。吳文忻表示同M8經理人公司已完咗合約，佢話：「八月已經完咗約，𠵱家同其他公司傾緊，不過𠵱家重未落實，所以唔講住。呢排都接咗啲登台騷，但我都想接啲戲同劇集拍吓。」
吳浩康涉嫌藏毒受審期間，有傳英皇會放棄吳浩康（Deep），當時鄺美雲曾經打電話畀楊受成為吳浩康求情，噚日鄺美雲喺旺角搞個佛學講座，吳浩康自然鼎力支持，佢話好感謝鄺美雲送咗兩本佛學書畀佢，陪佢度過艱難嘅日子，鄺美雲就覺得Deep係一個乖仔，佢話：「𠵱家啲年輕人成日都話壓力大，其實係要勇敢面對至真。」
