勇奪無綫「我最喜愛的男、女主角」獎的林保怡和黎姿，昨日凌晨拉大隊慶功，大熱倒灶的鄧萃雯和佘詩曼均有畀面到賀。不過，不少觀眾和網友均替雯女不值，昨日紛紛傳真報館和在網上留言，狂轟無綫漠視民意及處理手法不公。
林保怡和黎姿（GiGi）前晚在無綫《萬千星輝賀台慶》中，同時憑《金枝慾孽》一劇奪得「我最喜愛的男、女主角」獎，而鄧萃雯和佘詩曼則大熱倒灶。不過，黎姿雖奪得劇后寶座，但不少觀眾和網友卻替雯女不值，紛紛傳真到各大報館和在無綫官方網頁留言板上投訴，狂轟無綫有欠公平和透明度不足。
其中一名自稱是無綫忠實觀眾的趙小姐，抗議無綫不理民意，不遵從觀眾選擇，令最高票的雯女不能當選「女主角」，指摘無綫一方面叫人投票，另一方面又自行作主，不如將獎項改名作「無綫最喜愛的女主角」算了，趙小姐又直指無綫今次選舉十分多餘，揚言日後一定不會再參與。另外，更有網友揚言要罷看無綫劇集以示不滿。
據知，雯女今次敗給黎姿的最大原因，是因為她跟無綫簽的只是一般藝員合約，並非無綫的「自己友」（經理人合約藝人），反而黎姿稍後會簽無綫為經理人，日後瞓身為無綫效力，無綫自然趁機會力捧未來「自己友」。
而黎姿與雯女昨日齊到無綫將軍澳電視廣播城接受外地傳媒訪問，對於網友和觀眾為雯女不值而怒轟無綫不公平一事，她笑說：「民意分數只係佔三分一，可能有啲市民一直睇好我，所以偏激咗啲啫，咁我咪去安撫吓啲人囉。我係一個好有戰鬥力嘅人，有冇獎對我影響唔大，我會更畀心機去做，雖然今年攞唔到，但出年可能有更好角色。其實今次係雙贏局面，啲人好錫我，但TVB就鍾意黎姿，既然GiGi話攞獎係佢嘅推動力，咁佢攞又何樂而不為呢？攞獎係hit一排，唔係長久，實力重要啲。」
雯女前晚接受訪問時亦說：「自己攞實力非凡獎已經好開心，連續兩年攞，證明自己好有實力，GiGi攞我梗係戥佢開心啦，係《金枝慾孽》嘅人攞我都戥佢哋開心。」前晚雯女目睹曾志偉的如妃造型時，一臉不悅，問她是否不滿被志偉醜化？雯女卻說：「比我想像中好，但你覺得佢有本事美化咩？」
至於黎姿昨日則回應說：「每個artist都有唔同人鍾意佢支持佢，有好多唔同選擇，呢啲我哋控制唔到，自己會繼續努力，拍更多好嘅劇。」而記者就有關投訴致電無綫製作資源部副總監樂易玲了解時，她表示會跟陳志雲和曾勵珍一起在無綫明早九時五十分首播的《香港直播》節目中作出回應，與觀眾直接對話。
而前晚公布女主角得獎者後，阿佘仍強顏歡笑，記者問她是否感到失望時，阿佘連聲否認說：「唔失望，好開心，GiGi攞我覺得好好，《金枝慾孽》呢套劇攞到已經好好。」問阿佘認為自己輸在哪方面時，她耍手擰頭說：「咁敏感，唔答。」而黎姿前晚勝出後未有任何人上前恭賀，記者問阿佘為何不恭賀好姊妹時，她說：「我坐咗喺度，隔到好遠，所以咪冇囉。」
兩位出爐「男、女主角」林保怡和黎姿，昨日凌晨時分拉隊到灣仔唱卡拉OK消遣，阿佘和雯女等亦有赴會，眾人逗留至凌晨四時許，黎姿與阿佘先行離去，雯女則與保怡等轉到中環的Pub繼續消遣。而雯女前晚更先到九龍城與羅慧娟和劉倩怡等好友歎日本菜，才再往慶功，連走幾場的她蒲至天光才返家，玩得不亦樂乎。
此外，黃秋生、黎姿和林保怡昨往沙田出席「骨髓捐贈驗血大行動」，對於雯女落敗，秋生說：「恭喜佢，攞到獎未必係好事，攞唔到反而會更加進步，遲啲我會同雯女合作拍電影，做兩公婆。」
採訪：卓寶花、卓美娟
攝影：娛樂突發組
