九一年「救救小哥頓」轟動全城之後，每年重有好多癌症病人等住救，今年「骨髓捐贈驗血大行動」兩個搵緊骨髓救命嘅病人——羅瑞愛同鍾建邦，睇見噚日有咁多素未謀面嘅有心人去到沙田新城市廣場捱一針、抽兩茶匙血，真係感動到流涕！
四十歲患血癌嘅阿愛，前幾日啱啱做完第四次化療後喺屋企休息，嚟唔到現場親身多謝市民嘅熱心支持，佢老公阿生特登買咗個視像電話，等愛妻可以第一時間睇吓現場啲人幾咁愛心爆棚。阿愛好感激咁話：「見到咁多人喺度驗血，好開心同好感動，多謝晒大家幫助，希望呢次活動有機會幫多啲病人搵到啱嘅骨髓。」
而鍾建邦嘅爸爸媽媽、家姐同埋一眾親友噚日亦有到場為佢打氣，佢嘅一班保險界同事，重齊齊捲起衣袖即時驗血，用實際行動支持阿邦。「我哋成班同事今日專程嚟撐佢，阿邦份人咁好，我相信佢一定會好番。」阿邦嘅同事曾先生說。下月就係阿邦嘅二十六歲生辰，佢眼紅紅咁話：「我覺得好感動，有咁多人支持我，我知道會surewin。」
傳真︰2623-9278
電郵︰