我從來冇帶名片的習慣，在商業社會上可能係一樣冇禮貌嘅行為，但我又唔係好介意。曾經分別有過幾張不同電影公司的名片，但係都冇乜用過，因為我好怕名片上寫着「導演」兩個字，真係好怕。
有個做生意嘅好朋友，經常同佢打波，亦都經常會認識到佢其他做生意嘅朋友，大部份都係受過教育而有禮貌嘅人，雖然係唔同嘅圈子，但係相處上都冇乜大問題。有時遇上一、兩個草根啲嘅生意人，可能唔係好有學識，但係一個能夠創造商機嘅人，總係對未來有一種特定的看法和想像力，經常令我獲益良多。最近就遇上一個和我討論起佛經上有關「無間」的含意和暗示，令我自覺汗顏。
但係偏偏有時又會遇上一、兩個三唔識七嘅茂里一聽見你係做導演就問啲低能嘅問題，我最近亦都遇到一個。佢一知道我係做導演就即刻問：「跟住你咪可以介紹啲二三線明星嚟搞？」我正想發火之餘，朋友已經代答：「你咁嘅樣，八線嗰啲見到都唔開胃啦。」我唔係好嬲呢個茂里，我係經常會檢討自己嘅人。我照吓鏡，自己橫睇掂睇都係肥仔嘜一個，點睇都唔似龜公。係咪其他人睇電影行業嘅人唔係男盜女娼就係黑社會呢？所以各位同業要爭氣，改善其他人對我哋行業嘅睇法。雖然呢啲夠膽問低能問題嘅茂里只係少數。
我繼續選擇唔帶名片，我喜歡同不同行業嘅人吹吓水，可以增廣見聞之餘對自己創作上亦有幫助。但係希望啲茂里唔好再問我啲低能問題。