西九龍文娛藝術區究竟點收科，班立法會議員都有不同意見，楊森就大罵煲呔想繞過立法會，但係石禮謙就相反話政府擺佢哋上枱，明明係行政主導，𠵱家變成立法主導？分明想將隻黑鑊，卸畀立法會揹。
講開石禮謙，呢位老董舊下屬（佢打過東方海外嘅工），唔知係咪做過土發，加上要對選民（即係地產商）負責，所以佢對西九嘅評論特別敏感，重隨身袋住一篇龍應台《香港，你往哪裏去？》嘅文章，佢話篇文寫得好正，叫八方一定要睇，重話好仰慕龍應台。
八方都有讀過該文，係有心人嘅文字，令人感歎。香港最大一片海景地皮，究竟係畀「香港good水」，定係等人「無本生利」呢？過多幾個月就知。其實，𠵱家都知啦，大家不過一齊做場大騷，好似九七年選特首咁！之後點？大家記唔記得馬灣個公園？
傳真︰2623-9278
電郵︰