渴望成家立室<br>安仔唱定新歌迎乖仔

渴望成家立室
安仔唱定新歌迎乖仔

三十七歲的許志安,年初時高調宣布與鄭秀文結束十三年感情,單身的他十分渴望拍拖,甚至幻想組織家庭,故安仔特別在新碟中為未來兒子度身訂做一曲,並以爸爸的身份去演繹。

一見鍾情還靠了解
許志安和鄭秀文(Sammi)經歷了離離合合的十三年地下情,今年安仔曾高調宣布與Sammi劃清界線,不過兩人現時仍保持好朋友關係,兩人間中亦會以電話聯絡。
雖然現時安仔還未有發展新戀情,但他坦言很想拍拖,不過他若果再拍拖的話一定低調處理,安仔說:「因為感情係兩個人嘅事,不過我𠵱家都係工作為先,對於另一半自己冇定下一個目標,但係唔相信一見鍾情,我覺得一定要經過深入了解先會拍拖,不過一切都要睇緣份。」
雖然安仔暫時仍未覓得好對象,但他在新碟中就率先替自己實現成家立室的願望,更要求黃偉文為他未來兒子度身訂做一曲,並將歌名打正名號定名為《我兒》,安仔笑言此曲是送給未來兒子,自己更會以爸爸的身份去演繹該曲。

生隊籃球隊
對於將來的家庭生活,安仔就笑說:「生一隊足球隊就冇資格,不過有一隊籃球隊已經好夠,自己喺傳統家庭下成長,所以相信都會係先結婚後生仔。」

三心兩意遊戲樂壇
每年年尾都是四大傳媒頒發樂壇成績表的時候,各種是非接踵而至,今年最受歡迎男歌手就被認為是競爭得最為激烈的一個獎項。許志安、李克勤和古巨基三人皆被視為無綫勁歌頒獎禮最受歡迎男歌星的大熱人選。

製作花近大半年
不過面對各人出盡渾身解數為年尾頒獎禮衝刺之際,十月底才推出今年首張個人大碟《BACKUP》的安仔相比之下就較為輸蝕,除了歌路大大改變之外,安仔更放棄了他以往煞食的大路情歌,改向高難度歌曲挑戰,所以單是唱片製作和錄音上就花了近九個月時間,而安仔亦首次擔任執行監製一職,並邀請葉德嫻與他合唱《美中不足》一曲,希望藉着這張大碟能贏得漂亮的一仗。

損失百多萬酬勞
安仔承認贏獎要靠這兩個月努力,所以他不惜推掉了一套CCTV三十集重頭劇,估計損失百多萬酬勞,雖然安仔今次損失慘重,但他覺得未嘗不會有意外收穫。
安仔說:「因為套劇一拍就要成兩個月,所以我就推咗,但係我會幫手客串。其實做人蝕底啲,將來可能會有更好嘅回報,所以CCTV就話出年會搵我再拍另一套劇,到時重會唱埋主題曲㖭。」
問安仔有否信心擊敗對手,他就以一句「三心兩意」來回答,他說:「要對自己有信心,亦要有耐心去等待,努力工作,重要以平常心面對頒獎禮。作為歌手,做歌就要有意思,唔好因為要攞獎先去做好音樂,最後就自然會有意想不到嘅效果啦。」
對於與克勤屢傳不和的新聞,安仔就感到無可奈何,他坦言最重要的是他和克勤都明白到底是發生甚麼事情,他說:「大家都係樂壇嘅一分子,坦白講我同克勤𠵱家嘅感情重深厚過以前,同佢重愈來愈熟,我哋知有冇問題囉。」

拒做新四大天王
對於譚詠麟將他和克勤、古巨基及梁漢文評為「新四大天王」,安仔坦言寧願選擇做番自己,他說:「多謝阿倫嘅厚愛,但係四大天王時期我已經喺度唱歌,𠵱家先嚟做,我都三十七歲,我想做番許志安囉。」

後記:相信自己
近年有不少報道指安仔聲勢大不如前,面對這些攻擊性的報道,安仔從不安至坦然,他感慨地說:「成日都有好多負面嘢衝住嚟,我知道有啲雜誌係用咁嘅方針去報道,就好似將放大鏡倒轉睇。我就好相信自己。」
撰文:駱華齡 攝影:林德雄

在傳統家庭成長的安仔,表示一定結婚後才生BB。

安仔坦言十分渴望拍拖,但就不相信一見鍾情。

安仔在上月底才推出今年首張個人大碟,為年尾的頒獎禮作最後衝刺。

譚詠麟將安仔、克勤、古巨基及梁漢文評為「新四大天王」,安仔就表示已三十七歲,寧願做番自己。
資料圖片
左起:梁漢文、李克勤、譚詠麟、古巨基、許志安

安仔與Sammi結束了十三年戀人關係,令人大感惋惜。
資料圖片