何厚鏵宣布澳門公僕加薪五巴仙，恨死香港公務員，不過澳門係小池塘，香港係萬宜水庫，小池塘灌水好容易斟滿，香港恨都恨唔嚟。
笑問公務員T：「重有冇士氣？」公務員T話：「冇咗好耐咯，你哋見到報紙討論得咁熱鬧，猛講三三四、大嶼山物流園、西九龍、機管局私有化、十號碼頭、領匯上市，遲啲又會有兩電利潤管制，總之目不暇給。實在呢，只係我哋啲局長、老細表演，我哋就冇嘢㗎，內熱外冷，一於多做多錯，唔做唔錯，人工照支，炒我唔郁；上頭叫做一就做一，做二就做二，咪搞我。」
公務員T又話上頭告誡，要procedure為本（以程序為本），目標可以不理。因為target只係局長領功，錯咗程序，就局長、秘書長、公務員一概受罪。米老鼠盧維思以target為本，一心要搞出一個「維港巨星匯」，因為要趕快，錯咗程序，你睇吓今天下場幾慘，佢啲上司全部閃晒，剩低佢一個俾尊貴議員擲玻璃樽咋。以公務員嘅立場，你哋既然咁多人嘈三三四、西九龍，話知你呀，全部摺埋，唔使做，照支人工，安樂晒。
局長之中，有一位最受公務T欣賞，佢話老波骨局長碰到大爭論，一於採取「三不主義」，不投降、不撤退、不抵抗，任得啲尊貴立法會議員開火，佢展開太極神功堅持三不主義，一於同議員鬥磨，任鬧唔嬲，唾面自乾，立場則寸步不讓。
如果變成僵局又點呀？咁就得咗，啲議員鍾意出鋒頭、搶曝光，如果嘈嚟嘈去都冇結果，報紙認為已經失去新聞價值，唔再報道嘅話，議員就會另外搵議題去嘈，放棄三不局長去咬另一個局長！公務員T話呢個三不主義充份表現老牌公務員精神，至多唔做嘢，永不犯程序錯誤，安享長糧。