自從兩年前首套《哈利波特》喺聖誕檔上畫，11、12月就好似「哈利」月一樣，「大」朋友例必帶住「小」朋友上戲院睇；適逢今個星期碟場推出《哈利波特：阿茲卡班的逃犯》，簡直好似夾好時機一樣；今次佢使用咗雙碟版，特別收錄內容真係非常豐富，至於電影方面，好多人都係奉第一集為經典，不過筆者認為，《哈3》出現天狼星，是全套書由一本「兒童書」變為「成人書」好大一個轉捩點，哈利迷必睇。
記者：朱崇德
今個星期中《哈利波特：阿茲卡班的逃犯》到貨，銷碟情況都相當厲害，旺角街價！普通版$140，送筆記簿嘅特別版$145，所以好多人都搶特別版！此外，承住呢個「哈利月」嘅魔法時間，華納重推出了第1、2、3集嘅BoxSet版，特別之處係有「格蘭芬多」靚靚頸巾送，HMV賣街價$518左右，一般碟舖可以大膽話你知已經絕對冇貨，想買一定要快手。
隨着卑鄙的瑪姬姑媽，被哈利盛怒之下變為人肉氣球吹上半空，德禮家當然不再是久留之地，乘夜出走的哈利惟有漏夜搭騎士三層巴士，去倫敦斜角巷避難；不過估唔到升上三年級的哈利，原來有一大堆敵友難分之人，正在霍格華茲魔法學校等佢返嚟；首先係阿茲卡班的逃犯──天狼星‧布萊克，他是史無前例的阿茲卡班逃犯，而且亦與哈利雙親之死有莫大關連，傳說他是為了取哈利之命，而從地獄回歸的！此外阿茲卡班的獄卒──催狂魔，它們擁有吸走人類靈魂的法術，它們盤據住學校，而且對哈利的靈魂投以極大的興趣，哈利兩面受敵，感到彷徨無助。
老實講句筆者都係《哈利》小說迷，睇第一集時興奮之處，就係經常脫口而出的一句：「書裏面就係咁寫㗎！」不過今次第3集，真係刪除去好多書內細節，正如初執導演筒的艾方素卡朗所說，要跟足書中所有細節，電影起碼要用上16小時；那就再不是電影！是連續劇呢！
論戲中最令人興奮當然是由揭開老鼠班班的秘密、人狼大戰狗靈，以及哈利正面對決催狂魔！故事表達能力，好順暢自然，不過論劇情迫力，始終都有點唔及小說原著的力量，不過作為小朋友電影，都十分稱職。
成隻Disc2都係Bonus，最好睇是強尼凡恩及小鬼頭，合作訪問演員及幕後工作人員，睇唔出真人版哈利原來咁鍾意顯示自己，亦睇唔出妙麗咁斯文大方，最估唔到「小」奸角馬份，原來現實版是一個禮貌小孩！另外，Bonus內亦勁多互動遊戲，好似「幫手捉老鼠班班」、「卡多甘爵士驚險追逐遊戲」、互動式「自由探索蜂蜜公爵之旅」及「逛逛路平教授課室」等，全部用DVD機方向鍵就玩到，好方便。
