冠軍（092）唔係澳門狂熱，但呢隻股愈睇愈正。呢家窄頻通訊專家，04年度純利增長55%，去到2.97億元，上市11年，年年賺錢，04年業績係11年以來，第二佳績（2000年賺3億元），有理由相信，集團已經完全擺脫沙士因素影響，再踏高增長之途。
以PE論，不過4倍，科技股中，平到痹；又每股資產值3.57元，現價折讓62%，又係平到震。再講，04年所見，集團派息5530萬元，相對03年2760萬元起一個孖，可以講係無懈可擊。
呢期又要留意，冠軍計劃派發窩輪紅利，雖則已截止過戶，之不過，嚟緊星期五，冠軍會開股東會表決係咪通過派發紅輪，初步睇，紅輪擬定1年期，換股價1.38元，溢價唔慌貴，紅輪同正股相互刺激，效應唔細，趁股東大會通過前，唔好錯過。
激成（184）係澳門地產股，趁股價重未狂飆，冷手隨時執熱煎堆。04年中期虧轉盈，純利3200萬元，手頭重有超過14萬平方呎發展中及待發展建築面積、48萬平方呎樓面待售物業，所控澳門土地儲備相當充足，呢期澳門大熱，激成可以發圍。
激成04年中期，澳門地區業務收益三級跳，貼近1億元，溢利貢獻高達4740萬元，照計，04年全年純利，上7000萬元或樓上無問題，PE落番10倍或單位數。激成每股資產值4元，現價折讓近半，重未計及馬交大熱下資產重估大升因素，相對其他賭業股，實淨好多，買定等放紙鳶。
錢雋