恒指跌12點，全日高低波幅唔夠120點，呢個波幅只係小兒科。就算個別藍籌如長實（001），高低波幅1.25元亦都好普通，不過啲輪價則有啲飛沙走石味道，例如長實C輪2258與2249，波幅就高達17%與16%。炒輪，可以三更閉翳四更富貴，然後五更又再P……。
𠵱家好多輪都係槓桿率高高，升跌快，賭輪至緊要計住個荷包頂唔頂得住，記住食得羊肉唔怕羶，食得鹹魚抵得渴。
恒指C輪：今個禮拜，恒指5日高低位224點，埋單計較上禮拜五微升3點，相當反覆。大市上到接近52周新高，反覆好應該，估計仍會持續一段日子。喺反覆日子中做嘢，搵銀策略係低買高賣，買賣恒指C輪亦係咁做。恒指跌一二百點，買C輪。升番一二百點，沽之哉。升市之時，「狼」啲嘅做法則係反手揸恒指P輪，希望賺多一轉，不過呢種做法唔係個個啱，而且個市底仍靚，恐怕個市挾多幾挾，揸P輪俾人挾到頭破血流。
吼低位買恒指C輪，遠期啲嘅對象係4442同4444，兩隻都係明年3月到期，其中4442嘅條件，靚過4444少少，溢價與槓桿率都着數少少。
中企C輪：國企指數亦係喺高位反覆，整固緊，昨日埋單較上禮拜微升12點。吼住有調整之時買啲中企指數C輪，最佳對象係2204，明年1月到期，輪價15.4仙，溢價2.8%，槓桿率10.1倍（有效7.1倍），引伸波幅34.5%。
9448交投勁，年底到期，時日唔算太長，溢價7.5%則太高，博唔過。
章盛