香港測量師學會近幾年相當活躍進取，繼舊年底與內地及其他國家嘅測量師學會，達成資格互認協議後，啱啱又同新加坡測量師及估價師學會，以及馬來西亞測量師學會，一齊創立「亞洲測量師聯盟」。
香港測量師學會會長謝偉銓話，呢行過去都係以歐美馬首是瞻，乜都聽晒歐美支笛。所以佢哋三個學會早排傾開，覺得亞洲咁大，又咁多發展機會，都應該有一個強而有力嘅組織，咁就促成呢個聯盟誕生。
暫時只係三地聯盟，因為大家都係英式標準，而且發展得比較成熟。
謝會長希望，聯盟將來可以不斷壯大，最終喺亞洲發揮重要影響力，以及提升業界專業資格及服務水準。
馬來西亞測量師學會會長羅崇昭話，佢一個月前去印度，同嗰邊行家傾開，佢哋都好有興趣，好想加入喎。
仲量聯行噚日有單簽，大家都期望九龍酒店有消息，不過，投資部負責人話，九龍酒店係由新加坡酒店隊伍主理，無可奉告。
香港投資部就忙於日前截標嘅西半山巴丙頓道地皮，事關業主同意，以大約億八出售。據悉，中標嘅唔係大好友信和，而係莊士機構。
巴丙頓道六D至E係兩幢舊樓，地盤五千八百幾呎，可重建四萬六千幾呎住宅，以億八計，每呎樓面地價三千八百五十，發展成本五千，日後賣樓應該有一定利潤。
有發展商話，個地盤位置靚，可惜前面條路較窄，唔適合起豪宅，所以出價審慎啲。
耀才證券大股東葉茂林，最近追捧價錢升幅落後大市嘅尖沙嘴舖，剛以三千萬，承接彌敦道美麗都大廈地下十四號舖，租金回報低至厘半亦在所不惜。
個舖六百呎，由時裝店每月三萬八租用至○六年。代理話，由於去年沙士，兼受東鐵工程影響，舖租跌至近年新低，同九七年比，得番四成唔夠。
不過，買家憧憬附近將改劃為露天廣場，加上河內道四街重建進行中，未來具升值潛力，所以唔介意低回報。
佢話，加拿芬道八至十二號D至E地舖，最新成交回報率都只係一厘七。
自從新地周國賢慨歎將軍澳樓價「嚴重落後大市」之後，凡係今年樓價升幅唔及港島或者九龍嘅區域，紛紛以「落後大市」自居，相信「落後大市」效應，將會喺新界各區出現。
好似利嘉閣噚日喺粉嶺牽晴間開舖，董事陳大偉話，該區八個指標屋苑，最新平均呎價二千二百幾，比年初只係升咗十三個巴仙，升幅「落後大市」，所以樓價短期內上升嘅空間好大。
佢重話，粉嶺屋苑銀碼細，易上車，投資或自住皆宜。
樓價「落後大市」總有因，咪以為落後咗，就一定會升得番。
電郵地址：