只計50cc嘅綿羊，全澳門已經有超過4萬架！但係喺澳門，50cc嘅綿羊極速限制係40km/h、70cc嘅綿羊亦只係60km/h，一眾車手惟有抑壓住內心一團飆車之火，等待今日喺格蘭披治大賽中舉行嘅綿羊賽，喺東望洋盡情爆發狂飛。要扭盡狂飆，座駕當然亦要盡改，以下呢4位車手就各自用咗超過4萬蚊嚟改裝一部原價萬幾蚊嘅綿羊參加今屆賽事，將50cc羊改成70cc，極速重可以去到160km/h，勁！
記者、攝影：馬慶武
今年代表「偉利達」出賽嘅華哥係上屆125cc級別綿羊賽王者，覺得經驗最重要：「96年開始我已經喺東望洋玩房車賽，而東望洋大部份道路未封路前都係雙線行車，同正式比賽時嘅賽道狀況好唔同，所以對賽道熟悉有一定優勢。而賽綿羊比賽房車更好玩之處，就肯定係山路飛馳一段，全程扭盡見彎劈彎，真係好有快感！」
經過水塘北彎之後，基本上都無乜大彎，車手加速至此路段，就算70cc綿羊亦起碼有140km/h。
經驗豐富嘅華哥話前段大直路車手定必瘋狂加速，嚟到呢個近乎90度嘅葡京彎隨時收唔切炒車收場！
阿林就話最驚呢個彎位：「雖然唔係急彎，但係賽道突然收窄，好易出事。」
一眾車手對出晒名嘅髮夾彎都話唔同佢搏，並採取放棄態度，而且髮夾彎唔畀爬頭，一於出彎先再鬥過。
鍾意睇炒車嘅「黑心」車迷記得要買葡京看台，至於要感受衝線一刻就梗係坐大看台或相中嘅水塘彎看台啦！
無頭車迷
水塘彎看台無遮掩，唔想好似相中人變成「無頭」車迷，記得戴帽同太陽眼鏡。
入口附近設置大量攤位售賣賽車精品，惟採訪當日只有BMW.WilliamsF1及富士車隊精品兩個攤檔開檔。
綿羊賽4:30pm開戰
綿羊賽全名係「第二屆澳門格蘭披治大賽車委員會盃自動波電單車賽」，參賽者全屬澳門居民，今年跑足5個圈，70cc及125cc級別同場同時舉行但分開計分。計時練習賽於今日8:10am舉行，正式比賽將緊接第三十八屆澳門格蘭披治電單車財神酒店大賽，於4:30pm舉行。
購票處設於碼頭出口
票價：由12歲以下?持學生證者$80至兩天套票$700都有
購票方法：售票處設於澳門碼頭地下出口前，買票後可經行人隧道通往對面馬路嘅賽車場，或可經香港訂票。
24小時訂票熱線：71717171（香港）
網址：
