今個禮拜三，被《時代》周刊亞洲版譽為「最佳講壇」嘅亞洲協會搞午餐會，請咗里昂首席經濟師韋卓思（JimWalker）（圖）嚟講中國經濟，八方以前喺里昂公布風水指數時見過佢，於是去捧吓場。翌日，打開《壹週刊》，又見到佢張相，話佢死咗！
唔係咁猛，只係美麗嘅誤會。話說里昂有兩個JimWalker，上個禮拜去世嗰位，係《南早》記者出身，後來擲筆從商，創辦里昂亞洲，後來又去咗野村，二千年八月，佢重投里昂，做證券部門主席，此後里昂就有兩個JimWalker。在二千年佢重返里昂時，《南早》都問過里昂：你哋間公司咁咪有兩個阿Jim，好亂啫？里昂發言人就答：唔驚，我哋一個叫Jim，一個叫Dr.Jim（即係韋卓思，健在嗰位）。壹仔一時不慎，攞錯咗Dr.Jim張相。不過，老外應該冇咁介意嘅。
傳真︰2623-9278
電郵︰