爆機狂迷：Fans期待RPG式玩法
再度出發搵龍珠《龍珠Z3》

孫悟空、孫悟飯、比達等一班《龍珠》人物又再次會於PS2上登場，新一集《龍珠Z3》內容以漫畫及卡通原作劇情改編，加上一般場景到格鬥戰畫面，都愈來愈接近動畫質素，重加入RPG式升級系統，作為Fans一分子梗玩得特別過癮，難怪一眾Game舖都以《龍珠Z3》看門口！

記者：許福合

遊戲類型：動作RPG
對應機種：PS2
遊戲人數：1至2人
售價：約$450（美版）
開發商：BANDAI
(c)BIRDSTUDIO/集英社．東映動畫/BANDAI2004

今集同以往一樣，歐版同美版都會率先推出，而日版排期到下年年頭，足足快了近2個月。雖然介面文字都轉晒做英文，睇慣日本動畫可能唔太習慣，不過可以先玩為快，相信Fans都不會介意。
除咗遊戲畫面得到改良外，遊戲登場人物囊括咗包括原作漫畫角色與動畫原創角色在內，合計會有超過40名角色登場，即使最新電影版《傳說中的撒亞人》，以及動畫最新作《GT》等角色都會出現，而遊戲更會有隱藏角色，當完成一名角色故事，就可開啟下個隱藏角色，保持遊戲新鮮感，Fans定不能錯過。

格鬥戰似足卡通
遊戲新加入RPG系統，要靠不斷戰鬥升級，不過講到最精髓，仍然係當中格鬥戰，除一般常規招式外，更可經探訪友人或到野外得到「武技卡」而學得新招式。得到新卡後，可從上面看到出招方法，較麻煩係拳腳招式以P、K、E、G標示，要記住招式真係唔係咁易。筆者選孫悟空試玩，好快就可以學識龜波氣功同界王拳，不過對敵仍有點難度，一來對手閃避功夫一流，即使龜波氣功，大約亦只有7成命中率，還要同時有技巧地閃避敵人，否則好快玩完。當對手出波攻擊，亦可以學卡通內一樣，將波打走，不過時間要準，失敗只有硬食一記。

升級提高能力
最叫Fans感到興奮，係可以親手培育一個獨特角色；當擊倒敵人後，就可以憑經驗值升級，亦可重點提升不同能力，如攻、防、體、氣、技、能等。攻擊係最佳防守，筆者就喜歡先加攻擊相關能力上，而隨遊戲進行，還有機會遇到神龍，能力將有機會進一步提升。講到格鬥戰，不能不提瞬間移動反擊同連續技能，遇到AI較高者如比達，就會出現上集嘅「靠估」招式，估中除可避過對手攻擊外，還可以立即進行反擊，令形勢逆轉。呢個部份會改為動畫方式進行，令遊戲更接近動畫，Fans玩落特別過癮。

尋找七龍珠
故事模式仍以尋找7粒龍珠為主，一開始可使用7名角色，每人均有唔同劇情及對手，以尋找龍珠為最終目標。一開始同原著故事一樣，要找龍珠可謂無從入手，因為地圖相當大，玩家要不停啟用「R1」掣感應附近特殊地點。遇上「？？？」問號字樣，就有機會找到龍珠雷達，這樣找起來就輕鬆得多！除故事模式，最好玩係天下武術大會，會以淘汰方式進行，而規則就同漫畫內大致相同，例如唔可以於場外觸地等等，另外亦有即興式對戰模式，最啱用來招呼三五知己。