老董嘅「高官問責制」可能要改名叫做「高官自責制」，即係有嘢自己負責推銷，有鑊自己負責揹，一個唔好彩，就自己落埋台，大家幫你唔到。
八方咁講當然係有根有據，喺行會如是，喺立會如是，出到街都如是，好似煲呔嗰壇西九文娛藝術中心，除咗相關部門，邊個會睬你，為你講好話。
李國章就更唔好彩，八方聽聞，今次推334，佢老哥咪四圍撲，既上電視電台、又接受報紙訪問、出席論壇、見校長、見老師重要見埋名嘴，同當年葉劉推23條一樣，你想有司局長出嚟講句好話支持，好難啦，羅范有幫手，但係佢並非主要官員，只係太子章下屬，唔係老董核心團隊，唔算數。
當然另一個不可告人嘅原因，係眾局長大部份都係港大三年制精英，你叫佢哋贊成四年制，咪好低威。八方數一數，又的確不少港大局長，如冬冬、葉澍堃、王永平、林瑞麟、馬時亨、孫明揚、李少光等等至新人周一嶽都係港大仔女，太子章想喺董內閣有掌聲，真係難過登天，何況𠵱家嘅遊戲規則係潮州音樂「自己顧自己」。
好彩，太子章勝在精力充沛，今朝早八至九，又會喺新城《才俊群英會》聽到佢把聲，佢老哥好樂觀，話到目前為止，各方對334嘅反應都好正面，細節重要傾，一切都為學生好。佢重形容教改同醫病一樣，一斷咗症就去馬，唔可以拖拖拉拉喎。
傳真︰2623-9278
電郵︰