英皇中國（296）供股集資，進軍濠江賭業一事，終於落實公布，噚日復牌，一如經紀陳所料，果然勁升，最高見24.50元，收21.55元，升176％，但與其他濠江賭業概念股相比，英皇中國噚日嘅成交就顯得唔大，只係得2770萬元。
經紀陳話，人哋今次搞大茶飯，股價升得咁急，睇嚟小股東實肯供股，最矚目當然係配售代理出的報告，話睇176元，果真係駭人；至於阿媽英皇國際（163）就續炒母憑子貴概念，最高12.55元，收11.80元，升8％，成交反而重大啲，有3144萬元。
另外，轉型多次嘅陽光體育媒體（307），今次又將改名做泰德陽光，兼且轉型做教育事業，江湖傳聞新管理層入主之後，將會陸續有收購行動。經紀陳話，家陣個市咁旺，大家炒股炒得咁高興，陽光呢類仙股，有多少消息就可炒一轉，所以可以留意吓。
陽光體育媒體昨日最高2.5仙，收2.2仙，升10％，成交金額631.85萬元。
慕容小初