臨近年尾嘅樂壇頒獎禮，又係歌星搏殺攞獎嘅時候，許志安今年人氣下滑，加上被古巨基同李克勤兩位勁敵夾攻，所以呢排佢搏晒命出擊，乜嘢無綫騷都有殺錯、冇放過！好似前晚安仔就去咗尖沙嘴龍堡酒店，為無綫TVBI招待內地電視台同廣告客戶嘅晚宴擔任表演嘉賓，安仔為隆重其事，重坐新車，着閃衫出現㖭。
前晚九點幾，安仔坐住佢架喺一個月前以約四十五萬購入嘅日產Elgrand黑色保母車到場，重着咗件繡銀線嘅黑色透視衫出現，但安仔一到埗就衝入會場，表演完又嗱嗱臨閃。
安仔前晚幫完無綫做細騷之後，噚日又去咗沙田馬場為無綫嘅《全天候馬匹亮相圈揭幕大匯演》綵排，因為佢同容祖兒會喺節目度打頭陣，所以佢即使畏高，都照坐喺一隻鐵線砌成嘅馬，然後被吊到五層樓咁高表演！
安仔話：「其實我畏高㗎，但愛靚唔愛命，如果試嘅時候OK嘅話，我會考慮唔戴安全帶。」
正式綵排時，安仔初頭都冇戴安全帶，到吊到五層樓時，安仔已經慌失失，即刻綁番條帶，落地時忍唔住話：「真係幾驚㗎，要綁番條帶。」安仔又話佢嘅性格係唔衰得，所以頂硬上都要喎，真係辛苦晒佢囉！
張藝謀嘅新片《千里走單騎》噚日喺雲南麗江開鏡，一直未有露面嘅日本殿堂級男星高倉健同導演張藝謀前日喺雲南出現，戴住太陽眼鏡嘅高倉健精神奕奕，佢用日文話：「我雖然是第一次來雲南，但是我很喜歡這裏，能在這裏拍戲我很高興。」
麥浚龍（Juno）同師妹吳日言（Yan）噚日去咗商台接受訪問，Juno講起前排漂咗四次頭髮後整傷頭皮，之後洗頭重成塊頭皮甩出嚟，搞到佢痛到瞓唔着。而阿Yan近日染咗一頭紅髮，所以啲人一見到佢就話佢好紅，聽到佢不知幾開心。
張東健最近告一間藥廠侵犯肖像權，佢要求對方賠償二百幾萬港紙。不過，呢件事竟然峯迴路轉，間藥廠聲稱張東健之前已經同佢哋簽咗約，佢咁做令間藥廠名譽受損，所以張東健反而俾間藥廠告番轉頭！
李彩樺呢排成日以性感打扮亮相，佢噚日去咗新城時就話唔係要走性感路線，佢話：「我性感底線係唔可以露點同露patpat，呢啲部位我係接受唔到，我亦唔會去隆胸，聽講隆完個胸會變硬，我都有興趣摸吓隆咗嘅胸部。」
