房委會轄下嘅一百五十個商場（大約數目）賣畀一間獨立新公司「領匯房地產基金」（TheLinkReit），然後「領匯」上市，聽講會集資二百二十億元以上，成為全世界最大嘅Reit（RealEstateInvestmentsTrust）IPO，故此全世界都會注意到。
「領匯」上市，好多人磨拳擦掌，拎定錢等認購。經紀K食飯之時，大聲疾呼，叫我哋點都要買番一啲，用嚟收息，佢估計「領匯」每年派息率，可達六點五厘，穩穩陣陣，將啲錢放喺銀行收零點零一厘，開玩笑咩？呢類股票，最啱退休基金、退休人士食息，其他人亦可買入，加強投資總回報。但Reit絕對唔係增長股，千祈咪期望太高，以為收息之餘，又可賺埋股價，外國投資者買Reit，主要係長期持有，絕不短期買賣。
聽完經紀K講，碰到保險S，佢話好多客戶已經周圍問幾時可以認購「領匯」，情緒十分高漲。照咁睇，呢次領匯上市，肯定吸引，散戶要排隊入飛，只希望領匯股票能夠照顧本港平民，分多啲畀我哋。不過保險S好擔心領匯上市有阻滯，因為報紙話泛民主派會組織商場租客向房委會抗議，要求（一）補貼日後商場裝修費用；（二）維持現有租約五年；（三）若租戶即時遷出，房委會不追究；（四）租戶可優先認購領匯股票。
嘩，離晒譜，呢啲租戶好貪心啫，既要五年租金不變，又要優先認股，你估香港啲納稅人欠咗你哋咩。如果此項報道屬實，散戶股民不如組織上街抗議特區政府輸送利益畀啲既得利益者（現在商場租戶），要求孫明揚、梁展文企硬，堅持如期上市。保險S慨嘆話：「好心啲泛民主派議員唔好感情氾濫，失去經濟理性，阻人發達（相對於紅簿仔利率零點零一厘），我都有投鄭經翰一票㗎，我阿媽就投余若薇一票，唔該佢哋聽吓我講！」