廖啟智幼子去年證實患血癌，雖然智叔為家中經濟支柱，又要應付兒子的醫藥費，近日他跟無綫斟洽續約問題時，竟遭無綫大幅減騷，智叔不甘屈服，已萌去意。
為無綫效力了二十五年的廖啟智，被傳近日跟無綫談續約時，遭無綫大幅減騷，令智叔極為不滿，雖然他是家中經濟支柱，與太太陳敏兒所生的第三個兒子文諾去年七月證實患上血癌，但智叔卻不願屈服，決定約滿後不再續約，另謀發展。
記者昨日致電智叔了解，他說：「其實我同TVB嘅合約十月已經完，但因為𠵱家我重拍緊《本草藥王》，所以將合約延遲咗。我係同TVB傾過續約，佢哋係有減我騷，但我冇唔開心，我只係覺得做咗咁多年，想唞唞，轉換一吓環境啫。TVB有新改革，要我哋適應，我哋唔係墨守成規，但我唔知自己適唔適應到。我喺TVB二十五年，我做呢個決定都好唔容易，好唔捨得。」
問智叔無綫是否要求他減到一年一個騷？他說：「咁又唔係，不過我自己估計，未來大勢所趨都會行呢個制度。」
智叔是家中經濟支柱，三兒子文諾患上血癌，單是醫藥費已花費不少，若智叔離開無綫，豈非失去固定收入？他笑說：「咁我哋好慳儉嘅，我二十幾年嚟都未離開過TVB，我都驚自己有少少難適應，但𠵱家都未到最後落實階段，遲啲我會返內地拍《本草藥王》，或者到時再諗清楚去向係點。」
採訪：戴彩煥