大市窄幅上落，恒指全日波幅不足百點，成交減至190億元，依然係整固格局。恒指散場微跌25點，報13799，主要受滙控（005）調整影響。港股呢半月升得較急，回氣好正常，相信調整唔會深，好快又會挑戰萬四關。
今日講新概念。「再生資源」同環保係一個好龐大嘅市場，內地現時每年回收再生資源總值就有成450億元人民幣，經營此類業務嘅公司，只要生意有門路，1年閒閒哋可賺3數億元。
中國資源開發集團（661）（前添發慶豐）就係成功轉型成為覆蓋資源再生開發領域業務嘅公司，由於概念吸引，股價近期雖已累積頗大升幅，但以前景來衡量，其未來的升勢可能更具爆炸性。
中國資源現時市值約17億元，但若每年能賺到三數億元，PE只係低單位數字，重係好吸引。
中國資源成立的合資公司（持有60.78%權益），合夥人來頭甚大，就係中國國務院的直屬企業中國誠通。合資企業已獲得進口「再生資源」批文，做緊生意，預期毛利率30%，目前正同內地多個省市洽商合作，建立3個再生資源加工園區，冀在3年內將合營公司再生資源處理量提升到500萬噸，目標在3至5年間成為再生資源跨國企業，總投資額40億元人民幣。
現年度（05年4月年結），再生資源業務已可提供盈利。
噚日收到新料，中國資源目前正同一家大型國家企業傾緊，能夠達成協議的機會達99%，而且好快會落實，單係呢單「刁」嘅生意，已經可以令合營公司嘅盈利三級跳。
中國資源發行17.52億股，其中大股東持有11.38億股，佔64.98%；北京鑫運通信持7616萬股，佔4.34%；公眾人士佔30.68%，有5.37億股，但此部份有頗大比例已落在中資集團手上，街外流通貨量其實極為有限，此類貨源集中在強者手上的公司，股價升勢通常都會很急。
中國資源升勢近日由0.60元起步，在0.85元形成旗形整固，前日大成交破位而上，短期最小量度上升目標係1.20元。
郭兆誠