效力曼聯嘅英格蘭超新星朗尼冇錯係好波，但弊在冇品，連最基本嘅互相尊重都唔識，如佢唔學吓點做人，唔使旨意可躋身世界級球員行列。
朗尼喺前晚對西班牙場友賽踢得好躁，周圍辣人，領隊艾歷臣為免佢俾球證趕出場，就喺完半場前換走佢。但朗尼對被換出表現得好唔忿氣，行到場邊時一手將紀念剛逝世嘅名宿E曉士同韋拿嘅黑紗劈落地。事後艾歷臣話朗尼咁做對先人好唔尊重，不過亦猛咁幫朗尼兜，話對方唔係有心，只係喺嗰一刻好唔開心，隨手搵啲嘢嚟發洩。
我求大俠非常唔同意艾歷臣嘅講法，事關朗尼已十八歲，係成年人，要對自己嘅言行負責任；況且，尊重係做人最基本嘅嘢，唔理大人同細路都應該識，而佢唔識尊重人，反映佢品行好有問題，並且同喺巴拿比奴球場高唱歧視黑人歌曲嘅西班牙球迷根本冇分別。
德國前晚友賽喀麥隆，首次以紅衫白褲紅襪比賽，結果由古蘭爾入一球同高路斯入兩球，大勝三比○。事後有人話紅利德國，我求大俠就認為教練奇連士文先係福星。奇連士文上任後進行大改革，除重用年輕球員外，亦引入其他國家嘅訓練方法。德國衰咗咁耐，今次有救嘞！
伊朗老牌前鋒戴伊喺前晚場世盃外圍賽入三粒，幫球隊贏老撾七比○同出線八強決賽周。連同呢三球，戴伊喺國際賽嘅入球一百零二球，超越匈牙利普斯卡斯以及巴西比利，成為喺國際賽入波最多嘅球員。亞洲不嬲都俾歐洲同美洲比下去，戴伊今次總算幫亞洲足球爭番口氣。
記唔記得兩年前巴塞隆拿大戰皇家馬德里時，巴塞球迷向費高掟豬頭？原來呢個豬頭仍存在，喺德國一個以球場暴力主題嘅展覽出現。豬頭無被製成標本仍然健在，皆因主辦單位一直用化學藥物浸住。皇馬星期六又到魯營球場同宿敵碰頭，唔知巴塞球迷到時有無新展品貢獻？
不論大小國腳，英格蘭友賽西班牙都出現球迷種族歧視事件；有傳曼城中場胡禮菲臘斯受到馬德里兩間球會垂青，力爭呢位世足壇潛質新人。我求大俠奇怪，既然西國球迷種族歧視問題嚴重，而且「胡禮仔」真係加盟其中一隊嘅話，肯定更受敵對球迷憎恨，到時點踢到好波？